ADUNAY dako nga kasayuran ang Encila sisters kalabot sa mga ilegal nga transaksyon sa Kuratong Baleleng dinhi sa Sugbo.

Gawas nga ang balay niini sa Barangay Casili, lungsod sa Consolacion giingon nga gihimo nga bodega sa shabu sa grupo alang sa pag-apud-apud sa Sugbo, giingon nga si Jocelyn (angga Joy) ang kontak sa mga hatagan sa kinilo nga drugas.

Si Janelyn ang tigkubra ug tig-deposit sa halin sa account ni Rustico Igot, kinsa kanhi kapuyo ni Joy nga anaa sa New Bilibid Prisons.

Kini ang gipahibawo sa hepe sa Mandaue City Police Office, Colonel Julian Entoma, human nga ila usab nasuta nga si Igot ug ang Kuratong nag-usa nga naglihok sa Sugbo.

Ang Kuratong nga nagbase sa Ozamis City gidudahan sa kapulisan sa dakbayan nga likod sa kamatayon ni Janelyn, kinsa gipusil pasado alas 7 Miyerkules sa gabii, Marso 6, sa sityo Caimito, Barangay Labogon.

Si Joy nasikop ug nakuhaan og 10 ka kilo nga shabu niadtong Dominggo sa kaadlawon, Marso 3.

Ang pamilya ug paryente sa duha giawhag sa kapulisan nga makig-alayon kanila aron wa nay kinabuhi pa nga makalas.

SURRENDER NA LANG

Lakip sa giawhag ni Entoma kadtong uban pa nga adunay nasayran o nalambigit sa Kuratong nga naglihok karon sa Mandaue City, lakip na sa lungsod sa Consolacion hangtud na sa Lilo-an, sa pagtahan.

Ang grupo niini sa Dakbayan sa Talisay nabungkag tungod sa subsob nga kampanya batok sa illegal drugs.

Matod ni Entoma nga ilang nakita nga nilihuk ang grupo sa Kuratong aron way si bisan kinsa kanila ang makapagawas og dugang impormasyon kalabot sa transaksyon sa grupo.

Nagduda sila nga gamiton sa grupo ang self-confessed hitman ug kanhi barangay kapitan sa Borbon nga si Jinnefer “Iper” Mercader, kinsa nakaeskapo niadtong Martes sa gabii, Marso 12, sa prisohan sa lungsod sa Medellin.

Si Mercader niangkon dihang nadakpan nga daghan na siya og napatay nga mga tawo.

PATAK-UMON

Gipasabot ni Entoma nga nakita nila nga adunay intensyon sa pagpatay ang grupo human nasuta nga gibira pagawas sa taxi si Janelyn una gipusil sa makadaghan nga higayon sa nag-inusara nga lalakeng naka-helmet.

“I’m calling all those who are linked with this drug group to surrender to authorities as they will be liquidated by the Ozamis group as the Encila family has broad knowledge of the drug syndicate of the Ozamis group. So, they must be silenced by their hitmen,” nagkanyon si Entoma sa iyang text message sa Superbalita Cebu.

Matod niya nga nag-ungaw sa kakuyaw ang kinabuhi sa ubang mga sakop sa pamilyang Encila.

Matod ni Entoma nga posibleng nakita sa grupo nga wala nay gamit si Janelyn, ug nakita nga threat na kanila, human masikop ang maguwang ug mga ginikanan.

Kini human usab giingon nga niduol kini sa usa ka radio station ug nagpatabang kay giingon nga gihalughog ang ilang balay sa usa ka pulis usa ka adlaw human ang pagkasikop ni Jocelyn ug sa mga ginikanan.

Si Police Major Ramil Morpos nitug-an nga sa nakuha nila sa dugang pakisusi, nasuta gikan sa anak ni Joy, kinsa kuyog ni Janelyn niadtong pagkahitabo, nga nang-lock sila sulod sa taxi.

Samtang nagpaabot nga makakuha og kwarta nga iplete ang uyab ni Janelyn sa sulod sa balay, usa ka lalake kalit nga nipugos sa pag-abri sa pultahan sa passenger side sa likod sa taxi.

Sa pagtuo sa bata nga kaila ra, giingon nga gi-unlock niin ang pultahan, hinungdan nga naabrihan ug gibira pagawas si Janelyn una gipusil sa makadaghan nga higayon.

Gani giingon nga nakasiyagit pa si Janelyn sa paghangyo nga dili patyon.

“Gikan man daw ni sila nanghakot sa ubang mga gamit nila sa Casili, Consolacion, then prior sa incident, gikan daw ni sila sa Consolacion police station, dayon sa dihang nagsakay sila og taxi padung sa Labogon, nakamatikod na daw ning biktima nga naay nagsunod nila nga nag-motor. Ato bitaw gipangutana ang uyab sa biktima, nganong wala nalang sila nilahus sa police station, kon nakabantay na diay sila nga naay nagsunod. Siya ra gyud ang intensiyon nga patyon kay, gibira man gyud siya pagawas sa taxi,” asoy ni Morpos.