SUPERBALITA CEBU

Super Suroy: Mag-chillax sa Sundaze Farm

GIBANABANA nga usa ka oras gikan sa siyudad sa Sugbo, maabot na nimo ang bag-ong suroyanan sa dakbayan sa Carcar nga nakadani karon sa langyaw ug lokal nga mga turista gumikan sa kanindot sa talan-awon.

Sud sa 1.7 ka ektarya nga luna sa bukirang barangay sa Valencia, nahimutang ang Sundaze Farm nga naghatag og nindot nga kasinatian sa mga bisita gumikan sa garden setting ug presko nga hangin ilabi na kadtong gusto nga mag-chill ug mag-relax gikan sa ka-busy ug ka-stress sa trabaho.

Kon sa mga millennial pa, Instagrammable ang mga hulagway nga makuha sa farm.

Niadtong Pebrero 20, gibuksan ngadto sa publiko ang farm nga gipanag-iya sa pamilyang Veloso.

Kaniadto ang dapit usa lang unta ka bakasyonanan sa pamilya ni Sweet Veloso-Selma, tag-iya sa Sundaze Farm diin nagbarog ang ilang resthouse.

Nagsilbi usab nila nga private farm sanglit ang iyang mga ginikanan nga sila si Domingo, 55, ug Joy, 56, pulos hilig mananom ug mag-landscaping.

Apan human sa pipila ka mga pagbisita sa ilang mga kabanay ug suod nga mga higala, ang pamilyang Veloso nakahukom nga palambuon ang lugar ug himuon nga outdoor destination.

Mga Atraksiyon

Ang maong farm adunay lainlaing lounge areas alang nga pampamilya, managhigala ug manag-uyab diin pwede sila mag-relax, magpahulagway o mag-selfie, mangaon, manginom o mobasa og mga libro.

Anaa ang viewing deck diin malantaw ang kabungtoran sa kasikbit nga lungsod sa Barili ingon man ang Bali corner, Boho area nga Bohemian ang style ug nindot pang-background sa magpahulagway.

Adunay Tipi area, fire pit area nga may lima ka mga samin nga nag-atubang, kawayan nga giporma og lingin nga gilibutan og mga tanom, wishing well, mga duyan diha sa dagkong punoan sa kahoy ug mga banig nga perfect alang sa mag-picnic.

Aduna usab duha ka glamping tents sa tag P500 matag usa diin masud ang tulo ngadto sa lima ka mga tawo ug Alfresco Lounge nga P500 ang abang nga masud ang 15 ngadto sa 20 ka mga tawo. Kon mogamit sa maong mga area, libre na ang pagsugba.

Mobayad og P100 kon magsugba nga dili mogamit sa glamping tents ug Alfresco Lounge.

Samtang P100 ang corkage fee alang sa magdala og pagkaon ug alcoholic ug non-alcoholic drinks sa bisan pila ang gidaghanon niini.

Refreshments ug local delicacies gikan sa Carcar sama sa chicharon, ampao, chips ug bukarilyo ang gidalit sa ilang cafe ingon man pancit canton ug hotdog.

Sumala ni Sweet nga maoy nagdumala sa Sundaze Farm, ang ubang bahin sa farm kay nakuha nila ang konsepto gikan sa mga lugar nga ilang nasuroyan na sa Pilipinas ug abroad.

Si Joy, inahan ni Sweet kinsa gradwado sa civil engineering, ang naghimo sa landscaping samtang ang amahan nga si Domingo maoy nangunay og pananom sa lainlaing klase sa mga buwak ug halaman.

Hilom ang lugar tungod kay limitahan nila ni Sweet ang pagdawat sa mga bisita.

Dugang atraksyon usab sa dapit ang nagkalainlaing klase sa buwak sama sa cosmos, celosia, rose ug uban pa sa garden.

Duna usab lainlaing mga punoan sa kahoy nga mamunga sama sa passion fruit, butong, abokado, ug lemonsito ug naplano sab ang tagdumala nga mananom og lainlain mga klase sa spices.

Dugang Pagpalambo

Sigon ni Sweet sa dili pa matapos ang 2019, manawat na sila og mga bisita nga mag-overnight.

Nagplano usab sila nga magbutang og infinity pool sa farm alang sa mga bisita nga mag-overnight.

Abli ang farm gikan sa Miyerkules hangtod sa Dominggo, gikan sa 10:00 sa buntag hangtod sa 6:00 sa gabii.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph