KARON nga nakasinati og weak El Niño ang Sugbo ug pipila ka parte sa Central Visayas, mihangyo ang Department of Health (DOH) 7 sa publiko nga mokooperar sa pagpanglimpyo sa ilang mga tagsa-tagsa mga tugkaran.
Mao kini ang awhag ni Dr. Shelbay Blanco, ang pangu sa Regional Epidemiology and Surveillance Unit (RESU) 7 subay sa nagkasaka nga kaso sa dengue sa rehiyon.
Gani, sa labing ulahing tala sa DOH sa kaulohan, nag-una na ang Central Visayas lukop nasod sa labing daghang kaso sa dengue.
Sa datus nga gipagawas sa ahensiya niadtong Marso 6 ning tuiga, niabot na og 4,505 ka kaso ang natala sukad Enero diin 29 niini ang kompirmadong patay.
Niabot sa 233% kini nga pagsaka kon itandi sa susamang mga buwan sa tuig 2018 nga aduna la’y 1,352 ka kaso ug 8 ang patay.
Pasabot ni Blanco nga ang El Nino o ang labihang kainit sa panahon makapaspas sa pag-mature sa dengue virus.
“The higher temperature could increase the maturation rate of the virus itself,” matod ni Blanco.
Dugang niini nga sulod niining mga panahona, mausab ang feeding behavior sa lamok.
Kon kaniadto, mosaka lang ang kaso sa dengue panahon sa ting-uwan, karon anaa na matala nga kaso sa tibuok tuig.
Ang gitudlong hinungdan niini mao ang pag-usab ug pag-adapt sa lamok sa klima sa rehiyon.
Awhag niini nga mas hingusgan gyud sa matag kabalayan ang pag-panglimpyo sa ilang palibot aron wala na’y kapangitlogan ang lamok nga dunay dala nga dengue virus.
Subay niini, gitug-an ni Blanco nga gi-activate na usab sa DOH 7 sa tibuok rehiyon ang ilang mga Dengue Task Force hangtod na sa mga purok level nga motabang usab sa pag-monitor ug pagsumpo sa mga kaso sa dengue sa ilang dapit.
Usa ka matang sa lamok ang nagdala sa virus sa dengue nga mapasa sa tawo na mapaakan niini. (HBL)