DUHA ka mga bata nga babaye ug lalake nga nag-edad og 2-anyos ug paubos ang labing uwahi nga nakalas sa tipdas sa Sugbo.
Ang duha ka mga bata namatay kini tungod sa Pneumonia nga usa sa komplikasyon sa sakit nga tipdas.
Sa labing uwahing datus sa Department of Health (DOH) 7 niabot na sa walo ang patay sa Central Visayas (CV) sa sakit nga tipdas.
Matod sa pangu sa Regional Epidemiology and Surveillance Unit (RESU) 7 Dr. Shelbay Blanco nga usa sa hinungdan sa kamatayon sa maong mga bata mao ang ilahang pagka-undernourished o kakuwang sa saktong kaon, hinungdan nga dali kining nataptan sa maong sakit.
Nakatala na usab ang DOH 7 og 737 ka kaso sa tipdas dinhi sa rehiyon gikan sa buwan sa Enero hangtod Marso 6 ning tuiga.
Ang labing bata nga nataptan sa tipdas kay usa ka lima ka adlaw pa nga masuso.
Samtang daghan na ang misanong sa panawagan sa DOH 7 nga magpabakuna batok sa sakit nga tipdas.
Nakatala na ang ahensiya og 135,299 ka mga indibidwal ang nahatagan sa maong bakuna.
Matod ni Dr. Jeanette Pauline Cortes, ang medical officer IV sa DOH 7, nga nakaabot na sila og 36% sa kinatibuk-ang target nga mapabakunahan nga anaa sa 371,197.
Gitan-aw usab nga nakatabang sa pagsaka sa gidaghanon sa mga nagpabakuna ang pagsugod na sa pagpamakuna sa mga tunghaan sa matag lalawigan sa rehiyon.
Si Dr. Jonathan Neil Erasmo, ang hepe sa Local Health Support Division, nagkanayon nga ang nahitabong outbreak karon sa tipdas usa ka “wake-up call” alang sa mga ginikanan sa kamahinungdanon sa paghatag og bakuna sa ilang mga anak.
“The vaccine has been there many years ago even before sa bag-ong vaccine nga gi-introduce,” matod ni Erasmo.
Nagpadayon ang pagpanghatag og bakuna sa ahensiya dili lamang sa mga bata apan dili lakip na usab kadtong mga hamtong na ang pangedaron pinaagi sa ilang mga vaccination posts nga padayon pang naghatag sa libre nga bakuna hangtod sa katapusan sa buwan sa Marso. (HBL)