HUMAN nabutyag ang mga ngalan sa sindikato sa ecstasy o party drugs dihang unang gipagawas sa Superbalita Cebu ang drug matrix, ang kapulisan nakamatikod nga “nanglimpiyo” kini sa mga pangalan nga sakop sa sindikato.
Usa kini sa nakita nga gidudahang motibo sa pagbanhig-patay sa big-time ecstasy dealer sa Sugbo nga si Neil Benjamin Eugenio Yap niadtong Miyerkules sa udto, Marso 6, sa highway Seno sa dakbayan sa Mandaue.
Kini aron mahilom ug way dugang nga mabutyag nga ngan nga sakop sa sindikato.
Si Yap usa sa mga tawo nga gitumbok nga tinubdan sa druga nga naa sa ecstasy matrix nga giluwatan sa Police Regional Office (PRO) 7.
Ikaduha siya sa linya gikan sa nag-unang tinubdan o lider sindikato nga giingong usa ka babaye.
Si Yap gikan nitambong sa pagdungog sa iyang kaso sa dihang gibanhigan samtang nagmaneho sa iyang sakyanan sa dihang gibanhigan sa naasoy nga dapit.
Gitug-an ni Police Col. Julian Entoma, direktor sa Mandaue City Police Office (MCPO), nga posibleng nahadlok ang kaubanan ni Yap nga modiga na kini sa kapulisan sa mga nahibaw-an niini human usab kini nasikop sa Regional Special Operations Group (RSOG-7) niadtong Enero sa miaging tuig, uban sa laing negosyante nga si Roderick Ngo Go.
“Ato man gipasubay sa atong mga investigator ang pamilya kon wala ba kini kontra sa ilaha o sa negusyo, kon masuta nato nga wala, posibleng anaa ra gyud sa iyang ka-grupo kay aron unta pagputol sa nahibaw-an sa kapulisan sa ilang lihok,” asoy ni Entoma.
Base sa nakuha nga datus sa Centro Police Station sa MCPO nga nakapyansa si Yap human kini niduso og motion to bail sa kasong kalapasan sa section 5 in relation to section 26 sa R.A. 9165.
Nakapyansa kini niadtong Mayo 23 sa miagi nga tuig, pinaagi sa cash bail bond nga P250,000.
Gitug-an ni Police Major Aldrin Villacampa nga gikan nitambong og hearing sa maong kaso si Yap ug sa pagpauli niini padulong sa lungsod sa Liloan, kay nasuta nga anaa ang uban sa pamilya niini sa Liloan.
Giingon nga gikan sa korte, gisundan na kini sa mga mamumuno.
Matod ni Villacampa nga naglisod pa sila sa pag-ila sa identity sa mga mamumuno, kay gawas nag-full-faced helmet, dili usab makig-alayon ang mga tawo sa lugar nga nahitabuan.
Samtang, dili usab klaro ang mga kuha sa mga CCTV footage sa lugar nga naagian sa biktima.
Pero, matud usab ni Villacampa nga ila usab gisubay kon anaa kini na kontra sa laing grupo, ilabi na nga nakadawat sila og taho, nga human kini nakapyansa, nibalik kini sa pagbaligya og party drugs.
Susihon usab nila ang report nga lakip na gibaligya niini ang shabu.
Dugang ni Villacampa nga nakig-alayon usab sila sa pamilya ni Yap kon ugaling aduna kini nahibaw-an nga kaaway o nakalalis niya o kon si kinsa usab ang gidudahan sa pamilya nga likod sa pagpamanhig kang Yap.
Gisusi usab nila kon unsay kalambigitan sa grupo ni Ken Kenneth Rosales, kinsa napatay sa operasyon sa RSOG-7 niadtong Pebrero atol sa buybust operation, ug ni Yap.
Si Rosales ang gitumbok nga usa na unta usab sa dako nga player sa ecstasy sa Sugbo, ug giingon nga gikan niini ang party drugs nga gigamit sa na-overdose ang batan-ong si Ashley Abad sa bisperas sa Sinulog ning tuiga.