SAMTANG gipaabot ang kompirmasyon sa University of Cebu (UC) sa ilang pagsalmot sa four-team 2019 Araw ng Dabaw Invitational Basketball Tournament, ang city government of Davao mialokar og cash prize nga P270,000 alang sa mga mananaug nga tim ug individual awardees.
Si Dan Saguilo sa Sports Development Division sa City Mayor's Office (SDD)-CMO nagyagyag niini atol sa Davao Sportswriters Association (DSA) Forum sa The Annex of SM City Davao.
Ang mokampeyon nga tim modawat og P100,000 samtang ang runner-up mobulsa og P60,000.
Ang anaa sa ikatulo ug ikaupat nga pwesto modawat og P40,000 ug P30,000.
Ang most valuable player (MVP) ug best coach modawat og P20,000.
"Pero naa pa nay 20 percent nga VAT so ang ma-net gyud nila kay P80,000 sa champion, P48,000 sa second placer, P32,000 sa third og P24,000 sa fourth."
Dugang niya nga ang UC maoy ikaupat nga tim nga unang gialokar sa San Beda University.
Ang tim di kaapil tungod may naka-iskedyul silang duwa sa Marso 21 alang sa PBA D-League.
Ang kompetisyon duwaon, Marso 18-21.
Ang Samahang Basketbol ng Pilipinas (SBP) Region 11 officials mikonsidera sa Arellano University apan wa gihapon nagmalampuson.
Libre ang pagtan-aw, apan si Saguilo nagkanayon nga gikinahanglang magsayo ang molantaw tungod limitado lang ang lingkuranan sa Almendras Gym.