GISUGYOT sa Southern Mindanao Bus Operators Association (SMBOA) og "beep card" technology sa Davao City Overland Transport Terminal (DCOTT) board alang sa mas paspas ug di na mogamit og papel nga transaksiyon.
Gisulti ni DCOTT head Aisa Usop sa paghinabi kagahapon, Marso 7, nga ang maong proyekto gihisgutan ni SMBOA president Jerry Sy sa ilang board meeting kagahapon aron nga ipaila ngadto sa mga kompaniya sa bus.
Dugang ni Usop nga tulo sa 14 ka mga kompaniya sa bus nagpakita na og interes sa ilang proyekto. Kini nga mga kompaniya sa bus mao ang Davao Metro Shuttle (DMS), ACF ug NorBiliJun.
Matud niya nga ang gisugyot nga konsepto sa beep card project susama sa beep cards nga gigamit sa Metro Rail Transit (MRT) ug Light Rail Transit sa Metro Manila.
Dugang pa niya nga ang posibleng konsepto sa maong proyekto mao ang "cashless" tungod kay ang monetary value i-convert ngadto sa load sa beep card.
"Pagsakay sa bus i-present na lang didto sa konduktor. Siya na mag-punch so automatic ma-deduct na lang kung asa ang rota padung sila," butyag ni Usop.
Gikanayon ni Usop nga ang mga "factors" nga makabenepisyo ang kompaniya sa bus mao ang malikayan ang "shortage", di na kinahanglan og tawo o personahe, ug ang kurapsiyon maminusan sa pipila ka mga konduktor.
Dugang pa niya nga makabenepisyo sab ang terminal tungod ang beep card company gikan sa Metro Manila dunay sugyot nga magbaton og beep card loading station sa DCOTT.
Ang mga proyekto bentaha alang sa mga pasahero ilabi na ang mga tinun-an.
"There are times pod nga pag magbayad ang pasahero makalimtan nila ang sukli di na nila makuha," puno pa niya.
Hinuon, giklaro ni Usop nga ang badyet sa maong gisugyot nga proyekto wala pa mahisguti. (RJC)