Iro ipa-adopt

NAGPRESENTAR ang Davao City Veterinarian's Office (CVO) og krukis alang sa gisugyot nga "implementing rules and regulations" (IRR) alang sa Adopt-a-dog Ordinance nga magtugot sa mga Dabawenyo nga makasagop sa mga nadakpan o naluwas nga mga iro sa siyudad inay nga ipailawom sila sa "mercy killing" kon di makuha sulod sa tulo ka adlaw.

Atol sa pagdungog sa komite pangulohan sa buhatan ni Konsehal Mary Joselle Villafuerte niadtong Miyerkules, March 6, 2019, gikanayon sa CVO nga ang buhatan mahimong magklasipikar sa wala makuha nga mga iro alang sa permanente og temporaryo nga pagsagop ngadto sa mga kuwalipikado nga mga indibiduwal.

Ang kuwalipikado nga tawo nga mosagop makapili sa iro nga iyang ganahan nga sagupon basta usa lang ka iro sa samang higayon.

Giklasipikar ni Villafuerte sa iyang personal nga Facebook account niadtong Martes nga wala pa sila makamugna og krukis sa gisugyot nga ordinansa nga naglimita sa mga nanag-iya og duha ka iro, busa gisugyot ang IRR.

Mga kuwalipikado nga indibiduwal mao kadtong nagpuyo sa dakbayan sulod na sa unom ka bulan; dunay good moral character; legal ang edad; wala makonbikto nga naglapas sa Animal Welfare Act; ug kadtong dunay pakabana sa kaayohan ug pagprotekta sa mga iro.

"It shall be the duty and responsibility of the CVO to immediately, humanely, fairly and with care, preferably in consultation with a government-registered animal welfare non-government organization in the CVO's discretion," nahiunod sa section 4 sa gisugyot nga krukis.

Dugang pang gibutyag nga sulod sa tulo ka adlaw, ang nadakpan nga mga iro maklasipikar kon luwas ba siya nga sagupon, luwas sagupon apan i-rehabilitate, o peligro nga sagupon o di na puwedeng ma-rehabilitate.

Si CVO head Doctor Cerelyn Pinili nagkanayon nga ang bag-ong rehabilitation facility sa siyudad tukuron nga dunay badyet nga P5 milyon gikan sa buhatan ni Mayor Sara Duterte-Carpio.

Sa section 5 sa gisugyot nga draft, nahiunod nga ang maong pasilidad magdeterminar sa pisikal ug medikal nga kondisyon sa mga iro nga di molapas sa lima ka adlaw gawas lang kon gikinahanglan sa CVO nga lugwayan og taas nga panahon ang pagdeterminar sa ilang mga kondisyon. (Lyka Amethyst H. Casamayor)