ORMOC CITY, Leyte -- Giaresto sa kapulisan ang kanhi chief administrative officer sa Metro Ormoc Community Multi-Purpose Cooperative (OCCCI) nga may kasong qualified theft ug kalapasan sa Cooperative Code of Philippines.
Base sa report sa Police Regional Office (PRO)-Eastern Visayas, ang suspek mao si Arvin Villena, 35, taga Poblacion, Leyte, Leyte.
Si Villena ang top 1 most wanted sa Police Station 1 sa Ormoc City diin giaresto didto sa Leyte, Leyte, ala 1:30 sa hapon, Huwebes, Marso 7.
Si Villena gipasakaan og kasong qualified theft sa pipila ka miyembro sa OCCCI gumikan sa pagkahanaw sa P4.8 milyones nga bahin sa halin sa yuta sa Cambalading sa Albuera, Leyte ug duna usab sa Tacloban.
Ang city prosecutor nakakita og probable cause sa maong reklamo busa gisaka kini sa korte.
Nalutsan og warrant of arrest si Villena hinungdan nga nagtago-tago kini.
Ang maong warrant gi-isyu ni Ormoc City, Regional Trial Court Branch 35, Judge Gerlie Borrel-Yu.
Gani, ang usa sa mga kihante nga si Attorney Adelito Solibaga nagtanyag og cash reward sa makatudlo sa nahimutangan ni Villena aron kini madakpan.
Matod ni Solibaga, nalipay sila kay nakab-ot nila ang hustisya para sa mga miyembro ug kawani sa OCCCI.
Nasayran usab ni Solibaga nga ni-file diay og motion to bail ang kampo ni Villena ug sa dihang gi-grant kini sa korte, nihimo kini sa pag surrender ug nipiyansa.
Dugang ni Solibaga, mohimo siya sa pag file og motion for reconsideration o motion to cancel bail.
Bahin sa cash reward, susihon pa kini ni Solibaga gumikan kay mismo si Villena man ang mitahan sa kapulisan.
Padayon pa ang paghusay sa maong kaso.