MAGPANON ang mga Filipino-Americans (Fil-Ams) gikan sa kasikbit nga mga dapit sa Orlando, Florida alang sa pagsaksi sa nagkainit nga duwa sa National Basketball Association (NBA) ugma Marso 8, 2019 Biyernes (Sabado sa buntag Philippine Time) sulod sa Amway Center.
Dili lang tungod kay 1st Pinoy Basketball League (PBL) Heritage Night sa Orlando o The City Beautiful ug sa kinatibuk-ang Florida o Sunshine State apan ang laing atngan sa Basketball fanatics mao ang mga batan-ong Fil-Ams nga mosayaw sab sa sikat nga Tinikling atol sa Pre-game show.
Ang Eastern Conference ranked 9th ug host Orlando Magic ni coach Steve Clifford makigtigi sa bisitang Western Conference seeded number 13th Dallas Mavericks ni bench tactician Rick Carlisle sa nagpadayong NBA 2018-19 season.
“Mikabat sa $7, 000 ang ticket sales sa NBA gikan sa mga Filipino-Americans busa gitagaan mig tulo ka oras nga paduwaon ang PBL for free sa NBA court Amway Center karong Domingo Marso 24 (1:00 pm to 4:00 pm)” matod ni PBL Vice-President Armel Mosqueda sa Superbalita.
Ang PBL-Orlando gilangkuban sa mga ex-PBA players ug mga ex-Commercial/Varsity players gikan sa Pilipinas. Si ex-San Miguel Beermen Edward Naron ang nagsilbing Commissioner.
Si Mandaue City native Chad Roz ang PBL President, samtang si Leigh Aranas Mosqueda ang corporate secretary nga giabagan nila ni Buddy Alo ug Joseph “Joe” Libutan.
Kanunay nga magduwaan sa PBL-Orlando sila si ex-Alaska Aces Stephen Padilla, ex-Sta Lucia Realtors Vidal Labrada.
Gipaabot nga gustong ma knock out sa Magic (30-36) atol sa ilang engkwentro ang kontrang Mavericks (27-37) aron ilang ilugon ang ika-8 nga pwesto sa NBA East Playoffs nga kasamtangang gikuptan karon Miami Heat (30-34).
Hinuon dili sab sayon nga magpapildi ang Mavericks sanglit nag rebuild ang kuponan og angayan silang respetuhon isip 2011 NBA Champions.
Si 2019 Rookie of the Year candidate Slovenian star Luka Doncic, rookie Jalen Brunson, Tim Hardaway Jr., Dorian Finney-Smith ug Dwight Powell ang starting five, samtang backup gihapon sa Mavericks sila si Dirk Nowitzki ug ang manghod ni “Greek Freak” Giannis nga si Kostas Antetokounmpo.
Samtang sa habig sa Magic ang starting five langkuban nila ni slam dunk artist Aaron Gordon, D.J. Agustin, Evan Fournier, Nikola Vucevic ug Jonathan Isaac, magsilbing reliever sila si Isaiah Briscoe ug Khem Birch ug uban pa. (Daniel Quindao Guden, US Correspondent)