USA sa duha ka auxiliary bishop sa Archdiocese sa Sugbo, Bishop Oscar Florencio, ang hingpit na nga gitudlo sa Santo Papa isip military bishop sa tanang mga chaplain sa tibuok nasud.

Sa Abril 4 pa ang instalasyon ni Florencio, apan niadto pa lang Marso 2 gipahibaw sa Vatican ang appointment niini.

Hinuon, daan na nga Apostolic administrator sa dul-an duha ka tuig si Florencio.

Samtang kapin usab tulo ka tuig siya nga nahimo nga usa sa mga auxiliary bishop sa Sugbo, kauban ni Bishop Dennis Villarojo.

Apan kay karon hingpit na siya nga gihimo nga military bishop, nagpasabot kini nga kinahanglan na nga full-time ang iyang pag-supervise sa 130 ka mga chaplain, lakip na ang 15 ka mga retired chaplain sa tibuok nasud.

Kini mao ang mga chaplain sa kapulisan, kasundaluhan, sa Coast Guard ug uban pa nga law enforcement agency lukop nasud.

Gipasabot ni Florencio ang tanan nga mga chaplain lukop nasud ang giila sa simbahan nga lahi nga Diocesan.

Matud niya nga kon kaniadto sa iyang pagka-Apostolic administrator, bisan kon makapatuman siya sa mga governing rules sa pagkapangulo sa mga chaplain ning pagka-military bishop niya, gawas sa paggiya, mamahimo na usab siya makapatuman alang sa pagpa- reshuffle sa mga chaplain.

Nag-una nga buot mapaabot sa kanhi auxiliary bishop sa Sugbo ngadto sa mga chaplain ang pagtabang niining kawsa batok sa drugas sa mga law enforcement agencies.

Pinaagi sa pagtan-aw ug pagsabot kon unsay likud sa wala gihapon pag-undang sa mga mamaligyaay ug manggamitay sa ginadili nga drugas, diin iyang nakita nga usa sa nagtuklod niini ang pagkadalu o pagka- hangol.

“I will go to my chaplains, and tell them, try to look into beyond, like for example here in Cebu, try to look into other circumstances, not only the using, the pushing (of drugs), try to look into, like proper lakang, inorder to address that problem, (in which) what I see, there is greediness in every person, why? Because of easy money (in drugs),” saysay ni Florencio.

Si Florencio, kinsa na-install sa Archdiocese sa Sugbo isip auxiliary bishop niadtong 2015, ug nagdumala sa Santo Rosario Parish sa dakbayan sa Sugbo, ang nitug-an nga ang nakitang grabe og debosyon ngadto sa balaang bata ug sa Mahal nga Birhen Maria, ang iyang tinguha nga mapaabot usab ngadto sa mga tigpatuman sa balaud sa nasud. (FMD)