ASAWA sa lalaki nga namatay human aksidente nga nadasmagan sa usa ka pamasaheruan nga jeepney sa dakbayan sa Mandaue nipasaka og kaso karong hapon batok sa driver, samtang ang Land Transportation Franchising and Regulatory Board (LTFRB)-Central Visayas mohimo og linain nga inbestigasyon sa maong panghitabo.
Personal nga giduaw ang Traffic Unit sa Mandaue City Police Office (MCPO) ni Catherine Chan, asawa sa biktima nga si Elbert Dela Cruz Chan, 33 anyos, taga Barangay Talamban sa dakbayan sa Sugbo ug usa ka civil engineer sa construction company sa dakbayan sa Lapu-Lapu.
Kasong reckless imprudence resulting in homicide ang gipasaka sa pamilya batok ni Renato Llanos, 58 anyos, nga maoy driver sa PUJ nga 22G pag Biyernes sa hapon, Marso 8, usa ka adlaw human nahitabo ang aksidente.
Si Catherine ug Elbert usa ka tuig pa lang nga naminyo, gani mas gipili ni Catherine ang biyaan ang trabaho niini sa Singapore ug dinhi na usab sa Sugbo nitrabaho aron lang makauban ang bana.
Giplanuhan na unta nila ang magka-anak, apan dili na kini mahitabo human nga patay gyud na nadangat sa tambalanan ang biktima.
Gitug-an sa asawa sa biktima nga sila unta duha ang kuyog niadtong higayuna kay naandan nila nga magkuyog sa pag-adto sa trabahoan, ug sa maong dapit diin nadisgrasya ang biktima.
Pareho sila mag-atang og kasakyan sa maong lugar igpadung sa ilang tagsa-tagsa ka trabahuan.
Apan kay nadugay pagmata si Chan, ug kinahanglan na nga mo-duty ang asawa, hinungdan nga nabiyaan niya ang biktima samtang naligo pa kini.
Ug samtang anaa na sa gitrabahuan si Catherine alas 7:26 sa iyang phone, nakadawat kini og text message gikan sa bana, nangutana kon asa na kini.
Ug alas 8 na siya gitawgan sa tambalanan pagpahibaw sa nadangatan sa iyang bana.
Kahinumduman nga nadawat sa kapulisan ang maong report sa vehicular accident alas 6:30 Huwebes sa buntag, Marso 7.
Hangtud karon, giangkon sa asawa nga lisud pa dawaton ang nahitabo kang Chan, hinungdan nga bisan kon nangayo og pasaylo ang driver nga si Llanos, pasakaan gihapon nila kini og kaso.
Grabeng kasubo usab ang gibati ni Llanos, kinsa nitug-an nga natingala usab siya kon nganog kalit nga nawad-an og brake ang gimaneho nga PUJ.
Matud niya nga ikaduha nga round na niya kadto sa pagmaneho ug matag buntag, iya gyud i-check ang kondisyon sa sakyanan una mo-maneho, ug sulod sa 30 ka tuig niya isip driver, 20 ka tuig niini ang maong jeep na ang iyang gimaneho.
Dugang ni Llanos nga tinguha niya nga nakapahibalo siya sa mga pasahero nga wala nay brake ang sakyanan ug adto sa poste sa kilid sa dan sa B.B. Cabahug sa Barangay Guizo ibangga ang sakyanan, apan nalapas siya.
Nakita niya si Chan ug giserbatuan kini, apan giingon nga susama og wala nakadungog ang biktima, hinungdan nga grabe nga kaguol ug pagpangayo og pasaylo sa biktima ug sa nahibilin nga pamilya niini.
“Mangayo gyud ko og pasaylo niya ug sa iyang pamilya. Dili gyud nako intensyon nga madasmagan. Nakit-an nako siya, giserbatuan nako. Wala na gyud nako nakontrolar. Ang kondisyon atong sakyanan, maayo kaayo, nakabyahe na gud ko ato og usa ka round. Ikaduha na unta to nako. Ang ig-on unta nako ang poste, nya wa’ nadayon ko kakuan ba kay duol na gyud," saysay ni Llanos.
Sa lahing bahin, gitun-an karun sa LTFRB kung naa bay tulubagon si Llanos.
Matud ni Eugenio Ibo Jr., ang technical development officer sa LTFRB-Central Visayas, nga tun-an sa ilang legal unit kon unsay angay nga atubangon ug kon posible ba nga isuspenso o i-revoke ang prangkisa sa operator sa maong PUJ.
Hinuon, ang operator sa PUJ niabaga sa galastuhan sa tambalanan niadtong duha ka mga pasahero nga naangol ug nipasalig alang sa pinansyal nga hinabang ug ang pagpalubong.