GIPAMATUOD sa Oklahoma City Thunder nga mas epektibo gyud ang duha kay sa usa sa dihang ilang gipukan ang Portland TrailBlazers, 129-121, sa usa ka makutas nga panagsangka sa National Basketball Association (NBA) kagahapon nga miagi og overtime didto mismo sa Moda Center sa Portland.
Si Russel Westbrook ug Paul George maoy nagkumboya aron lupigon ang inusarang pagpakigkombati ni Damian Lillard nga maoy nagtuboy sa kadaugan sa Thunder kinsa hugot karon nga naghupot sa ikatulong puwesto sa Western Conference nga may 40-25 nga baraha.
Agresibo si Westbrook sa kinatibuk-ang panagsangka ug mipakatap kini og 37 puntos - lakip na ang three-pointer niini nga naghatag og labaw sa Thunder, 118-117, pito ka rebounds ug tulo ka assists sulod sa 40 minutos. Hinuon aduna siyay walo ka turnovers.
Sa iyang bahin, si George, milanit og 32 puntos, 14 ka rebounds, unom ka assists ug tulo ka steals ug siya usab ang responsabli sa pagselyo sa ilang kadaugan.
Sa ilang nahimo, ilang napatugbabawan ang 51 puntos nga gipabuto ni Damian Lillard kinsa daw sa nag-inusarang nakigbatok sa Thunder human nangapalyar ang opensa sa iyang mga kauban.
Sa laing bahin, mipakli og 29 puntos si Giannis Antetokounmpo midugang og 27 si Khris Middleton sa dihang gikusokuso sa Milwaukee Bucks 117-98 ang Indiana Pacers.
Ang kadaugan nga nakapasaka sa ilang record ngadto sa 46-16, maoy nagtubag sa duha nila ka sunodsunod nga kapildihan sa Utah ug sa Phoenix sa uwahi nilang mga duwa.
Ang 12-0 nga rally sa 4th quarter nga giduslitan sa floater ni Kyle O’Quinn maoy gihimong yawe sa Bucks sa pagkontrolar sa duwa.
Si Myles Turner mipuga og 22 puntos samtang si Bojan Bogdanovic mipuno oh 17 alang sa Pacers kinsa mau 42-24 nga baraha alang sa ikalima nga pwesto sa Eastern Conference. (JBM)