DALA ang dakong tinguha nga makabalik sa pinakadakong sporting event sa tibuok kalibutan nga mao ang Olympics, ang garbo ug giilang hara sa Sugbo sa lumba sa dagan nga si Mary Joy Tabal ang nangandam na karon sa iyang training sa Japan nga sa dili madugay sugdan na.
Si Tabal mosalmot sa Olympic qualifying race sa ScotianBank Ottawa Marathon 2019 karong Mayo didto sa Canada. Kining maong lumba mao usab kini ang naghatag kaniya og luna sa niaging 2016 Rio Olympics human niya makuha ang qualifying time.
“Kini maoy una nakong stage sa training para sa Olympic qualifying race. Naa ko diri sa Japan hangtod sa Mayo,” matod sa 29 anyos nga Tabal sa dihang gikahinabi sa SunStar Cebu pinaagi sa online interview.
Si Tabal nga gipaluyohan sa Motor Ace Kawasaki Racing Team makig-uban sa camp sa Japan nga gipangulohan sa Japanese trainer nga si Akio Usami, kinsa mao usab ang responsabli sa iyang preparasyon sa ubang mga lumba sama sa Southeast Asian Games (Seag), Olympic ug Milo Marathon.
“Ika-fourth day pa ron nako diri. Ang training molungtad hangtod sa Mayo 22,” matod ni Tabal kinsa mioras og 2: 43:29 segundos sa qualifying round alang sa Rio Olympic women’s marathon nga may 2:45 nga qualifying time.
Hinuon ning higayona wala pa sila mahibawo sa qualifing time sa Tokyo Olympics sanglit wala pa kini ma-release. (RSC)