MAGSUGOD na karong Lunes Marso 11 ang pagpanawat og mga aplikante para sa summer job program sa Cebu City Government.
Kini maoy gipahibalo kanako ni Sir Fidel Magno ang pangu sa Department of Manpower Development and Placement kun DMDP.
Huwebes sa sayong gabii niagi siya sa akong nahimutangan sa palibot sa Fuente Osmeña. Matod niya gikan siya nag-atiman sa iyang papa sa tambalanan.
Kay nailhan nako siya nga matinagdanon nga empleyado sa gobyerno bisan lapas na sa office hour wa ko magduhaduha pagsukna mahitungod sa maong programa.
Tayming kay karong Lunes na diay ang opisyal nga pagbukas sa tinuig nga programa nga nagtinguha nga makaserbisyo sa gatosan ka tinun-an nga gustong manarbaho panahon sa summer.
Matod niya ilang hangpon sugod karong Lunes ang mga aplikante nga nagpangedaron og 18 ngadto 30 anyos nga gustong mopahimus sa maong programa.
Ang pagpanglista himoon sa buhatan sa DMDP nga nahimutang sa 2nd floor sa Ramos Public Market. Mga trabaho nga ipahaum sa katakus sa mga tinun-an ang nagpaabot didto.
Ubos sa maong programa 60 porsento sa ilang suholan pundohan sa Department of Labor. Ang subra abagahon sa kagamhanan sa siyudad.
Di man ko produkto ning maong programa sa akong panahon, pero na-interes ko niini tungod kay akong nakita kong unsa kini ka epiktibo pag-umol sa atong mga batan-on ngadto sa usa ka responsabli nga mamumuo.
Ang suweldo permaninti man na. Pero ang pag-ugmad sa abilidad sa mga batan-on samtang nagtungha pa sila maisip nga pinaka importante sa maong programa.
Inay magpaabot nga mo-graduate ang usa ka tinun-an una pa makasuway pagpanarbaho dako ang bintaha nga karon pa lang makat-on na sila pagpahaum sa ilang kaugalingon sa kalibutan sa pagpangempliyo.
Pangutan-a ang nakasuway niini kaniadto. Wa sila magmahay. Gawas nga nakatigum og salapi, nabaid pa ang ilang utok sa natad sa pangempliyo.
Sa niaging tuig subra sa 300 ka batan-on ang naserbisyohan sa maong programa sumala ni sir Fidel. Nindot nga modaghan pa ang makatrabaho karong tuiga.
Ang laing benepisyo ning maong programa kay dako ang kahigayonan nga ang imong nasudlan nga kompaniya karon mao ra sab ang kompaniya nga imong sudlan unyag human nimo og eskwela.
Ang numero uno lang gyud nga tambag nga angayng hinumduman kanunay mao ang pagpakita kutob sa mahimo sa kugi og determinasypn nga makat-onan ang trabaho nga masudlan.
Sa ato pa ginadili ang magtinapol. Kanang moingon ta nga magkat-on kay may mga kompaniya nga nangita og trabahante nga zero knowledge ang aplikante.