NAGMULO sa hilom ang pipila ka mga kapitan ug mayor paghatod og serbisyo nga ang tanang bidding anha sa Kapitolyo sama sa tolda, tubo, tangke, hose, lamisa, lingkoranan, gamit sa mga mag-uuma, uban pa. Panahon ni Gov. Gwen Garcia ang gahin nga salapi sa serbisyo ug proyekto isalig sa barangay, lungsod ug siyudad butang nga gikalipay sa mga kapitan ug mayor nga makita sa ilang mga konstituwente nga maoy mopasubasta ug mopaimlementar.
Pakyas ang mga kapitan nga mangayog ayuda inig tan-aw sa listahan nga wala makadaog sa hingtungdang barangay.
Wala ipadayon ang pag-apod-apod og mga school supplies, abag sa BHW, Pasigarbo sa Sugbo ingon man ang kapakyas pagmintinar sa kadalanan.
Donasyon sa bagyong Yolanda alang sa amihanan gisimang sa habagatang kalungsoran kay gipamolitika.
Gipanghakot ang 11 ka mga culverts sa Balili property kay gigamit sa pribadong katuyoan. Ang mokuha og butang nga dili mananghid matang sa kawat.
Mahinungdanong ekipos lakip sa CT Scan Machine wala mapahiluna naa ra gibutang sa gawas sa district hospital nga wala magamit sa tukmang katuyoan ingon man sa kakulang sa mga doktor, nars, tambal, pabayron sa ambulansya ug mangayo pa gyod og allowance ang drayber nga duna man untay sweldo sa Kapitolyo.
Dili makiangayon ang hinatagay og bugas nga tulo ka kilong NFA rice apan sinakong ganador ug ivory sa mga suod. Mipalit og bugas sa pribadong supplier nga dobli ang presyo human wala motugot ang tagdumala sa NFA sa gi-order nga linibong sinakong bugas gumikan sa mando ni Pres. Rodrigo Duterte nga walay tugotan nga makapalit og daghang NFA rice nga ihaylo sa mga botante.
Janitorial services nga Extra Ordinaire igo lang mohan-ok sa basura kilid sa koral sa Kapitolyo. Ang taga GSO mao nay molabay ngadto sa dumping site nga unta kaakohan man sa Extra Ordinaire nga giingong gipanag-iya sa opisyal sa Kapitolyo.
Wala tumana ang lagda sa Civil Service Commission sa salary grade limit kabahin sa chain promotion nga gitawag og quantum leap. Dunay gipaboran nga gisaka sa taas nga posisyon nga gitumban ang mga kwalipikado. Job order employees sa mga board members nga wala mopabor sa administrasyon gipangtaktak. Casual nga mga kawani mitiyabaw kay gios-osan ang sweldo. Daghang naghawod-hawod nga mga little governor. Job oder employees mao nay modiktar sa mga daang kawani nunot sa pagsaway nga dili makamao. Ilang gipanghimaraot ang mga kawani panahon pa nilang Govs. Eddie Gullas, Lito Osmeña, Tingting dela Serna, Pabling Garcia ug Gwen Garcia. Labing nanghawod ang Cuatro Alas sa buhatan sa gobernador nunot sa mga anomalosong transaksyon. (csa_1156@yahoo.com / 09064648954)