PANAHON karon sa kuwaresma, busa tukma ang pamalandong bahin sa mga panghitabo sa palibot labina sa pagsiaw sa pagpamatay sa Metro Cebu, lalawigan sa Sugbo ug sa tibuok nasod. Gibasol sa ubang kampo ang paglusad ni Presidente Rodrigo Duterte sa gubat batok sa pagpayuhot sa gidiling druga.
Gihimakak kini ni Duterte apan iyang niangkon nga dili malikayan nga dunay makalas sa operasyon. Dili ba dunay taho usab nga nag-unay ang sindikato? Nanglimpiyo sa ilang miyembro?
Ang pagpatay nahisupak sa napulo ka sugo sa Ginoo.
Nganong dunay subsob nga panghitabo? Sa atong pag-animaw, ang tanang kaso dunay ilang kaugalingong istorya. Apan komon sa ilang sugilanon mao ang pagpuyo nila sa komplikadong kinabuhi, sama sa pagkalambigit sa sindikato sa gidiling druga ug uban pa.
Sa ulahing hitabo sa dakbayan sa Mandaue niadtong Miyerkules, Marso 6, sa gabii diin gipusil-patay si Janelyn Encila, igsuong sa unang nadakpan sa buy-bust nga si Jocelyh Encila sa lungsod sa Consolacion, tataw nga tungod sa ilang kalambigitan sa gidiling druga.
Ang pagpusil ni SPO2 Mikie Espina sa dakbayan sa Talisay ug ang pagbanhig-patay ni Benjamin Eugenio Yap sa Mandaue tungod gihapon sa ilegal nga kalihokan sa druga, diin ang naulahi suspek nga dakong supplier sa ecstacy o party drugs.
Klaro nga naulipon sila sa salapi ug kahakog bahandi nga kalibotan. Pagpuyo nga luho. Walay katagbawan sa naangkong grasya. Sila si SPO2 Espina ug Yap nga wala nag-ilaid sa kalisod human parehong dunay trabaho ug igong kaya ang pamilya.
Ug taliwala ning tanan, walay takos gyud sa pagpuyo sa kinabuhi nga simple o yano. Maningkamot subay sa lagda sa balaud. Gaan ang dughan ug puno sa pagmahal. Pundasyon sa malambuon ug malinawong komunidad.