GIHANGOP ra ni Lapu-Lapu City Mayor Paz Radaza ang gikatakdang pagpaubos sa status sa dakbayan sa Lapu-Lapu isip usa sa Election Watchlist Areas (Ewas) gikan sa orange ngadto na sa yellow status.
Kini nagpasabot mas menos ang risgo sa dakbayan kon maghisgot sa seguridad alang sa umaabot piniliay.
Nagkanayon si Radaza nga posible nga nakita sa kapulisan nga wala mahulga ang kahapsay ug kalinaw sa dakbayan kung hisgutan ang election hinungdan nga nahuna-hunaan sa kapulisan sa pa-ubsan ang status sa dakbayan ug naka-uyon siya sa maong kalambuan.
Dili pa final ang pag us-os sanglit isugyot pa kini ni Police Colonel Limuel Obon, director sa Lapu-Lapu City Police Office ngadto sa ilang counterpart sa Armed Forces of the Philippines (AFP).
Sa susamang kalambuan, si Pajo Barangay Kapitan Junard “Ahong” Chan, kinsa magpapili pagka mayor sa dakbayan atbang sa bana ni Mayor Paz nga si Arturo “Boy” Radaza, mibutyag nga dili siya uyon sa pag us-os sa status sa dakbayan sa Ewas ngadto sa yellow gikan sa orange.
Ang kapitan nagtuo nga mas nigrabe na hinuon ang nahitabong pag-pangharass sa iyang mga lider sa kabarangayan gumikan sa kainit nga panagribal sa mga kandidato sa dakbayan.
Laing gikabalak-an ni Chan nga molugak na usab ang kapulisan sa ilang ipatumang seguridad kun ugaling mapaubos na yellow status ang dakbayan ug hayan dili kapun-an ang pwersa sa kapulisan sa Lapu-Lapu gumikan niini.
Si Chan mibutyag usab nga duna na siyay nahibaw-ang mga armadong tawo nga giingong anaa na sa dakbayan sa Lapu-Lapu aron motisok ug kasamok ning nagsingabot na ang piniliay.
“Daghan naman gud panghitabo sa atoa ba base on the experience that we had nagpinusilay na ngadto sa Punta Engaño,” pasabot ni Chan. (GCM)