Lahug river limpyohan karon

LIMPYOHAN sa Cebu City Government inabagan sa volunteers ang Lahug river sugod alas 6:30 karong buntag, Marso 9.

Si Nida Cabrera, pangulo sa Cebu City Environment and Natural Resources Office (CCENRO), nagkanayon nga kapin o kulang 2,000 ka mga volunteers ang mosalmot sa river clean-up.

Manukad sa La Guerta sa barangay Lahug padung sa barangay Tejero nga gihulagway ni Cabrera nga hugaw kaayo.

Gitug-an niya nga ubay-ubay sa mga tunghaan ang moapil karong buntag sama sa Saint Theresa’s College (STC) Southwestern University (SWU), Don Bosco Technological Center (DBTC), Abellana National School disaster team ug daghan pang uban.

Matod ni Cabrera nga problema nila karon ang mga nagpuyo sa riverside sa Lahug sanglit ang mga tawong namuyo sa maong lugar adunay kasilyas apan walay septic tank ug ang hugaw diretso nga ilabay sa sapa.

Gumikan niini, ang City Government mopalit unya og mga septic tank para ihatag sa mga tawo para ang hugaw dili na ilabay sa sapa.

Gipasabot sa pangulo sa CCENRO nga inig human nila og limpyo, mopahigayon sila og massive information dessimination ngadto sa mga balay daplin sa sapa lakip na sa mga establishment sa dili pa sila mopahamtang og silot sa mga violators.

Gibanabana ni Cabrera nga mahuman ang clean-up karong alas 10 sa buntag diin libuan ka kilong basura ang ilang gitan-aw nga makuha gumikan sa basura.

Gihulagway niya mga epektibo ang clean-up drive sama sa ilang gihimo nga paglimpyo sa sapa sa Bulacao. (PAC)