COTABATO CITY -- Giangkon sa pamunoan sa Bangsamoro Autonomous Region in Muslim Mindanao (BARMM) nga naglisud sila sa gihimo nga transisyon human mamugna ug milingkod ang chief minister, uban ang mga miyembro sa Bangsamoro Transition Authority.
Apan gibutyag ni BARMM Chief Minister Al-Hajj Murad Ebrahim nga kabahin lamang kini sa mga hagit nga ilang atubangon sulod sa tulo ka tuig.
Gihangyo ni Ebrahim ang kooperasyon ug dedikasyon sa tanan aron mahimong produktibo ang ilang nasugdan.
Nagtuo si Ebrahim nga pinaagi sa ministerial governance, matul-id ang mga sayop sa implementasyon sa mga serbisyo ug programa gikan sa ehekutibo ug lehislatura.
Giklaro ni Ebrahim sa mga empleyado nga ang aduna lay permanent appointment ang mahibilin sa posisyon hangtud nga masagop na sa BTA ang plano sa transisyon.
Tagaan og kahigayunan kadtong may mga kontrata nga magpadayon sa ilang trabaho depende sa ilang mahimong performance.
Naghangyo sab kadtong mataktak sa trabaho sa kanhi Autonomous Region in Muslim Mindanao (ARMM) nga unta dunay makuha sila nga bayad sa dugay na nilang serbisyo sa lokal nga panggamhanan. (Edgar E. Fuezas)