NAGPATALA sa buhatan sa San Pedro Police Station ang usa ka crew sa sikat nga lechon haus sa dalang Tionko, Davao City gumikan giilad sila sa usa ka lalaki nga napakaaron-ingong kustomer sa ilang tindahan.
Subay sa blotter sa San Pedro PNP nga miadto sa ilang tindahan ang usa ka lalaki aron mopalit ug lima ka kilo nga litson.
Mihangyo pa kini nga ibalot ang litson sa duha ka parti ang usa, duha ka kilo ug ang usa tulo ka kilo.
Taud-taod mihangyo ang maong tawo nga dad-on usa niya ang duha ka kilo sa iyang amo kay gigutom na nga naay event sa usa ka hotel duol lang sa tindahan sa litsonan.
Apan kay “pay as you order” wala misugot ang tindera nga dal-on sa hotel nga walay bayad, busa nihangyo ang lalaki nga mouban ang tindera sa hotel kay didto bayaran.
Pag-abot sa hotel, gibilin sa lalaki ang crew sa lobby aron ihatud kuno niya ang litson sa iyang boss.
Taud-taod nabalik ang tawo ug giingnan ang crew nga kuhaon og balik ang tulo ka kilo kay bayaran, busa ang crew sa litsonan mibalik sa ilang tindahan aron kuhaon ang nabiling tulo ka kilo, apan pagbalik niini sa hotel wala na ang tawo kinsa unang midala sa duha ka kilo.
Dihang nangutana ang crew sa lechon haus kung asa na ang tawo nga midala sa litson, mitubag ang gwardya sa hotel nga igo ra nga nag-inquire ang maong tawo dayon milakaw.
Miuli ang crew sa ilang tindahan ug nanugilon sa ilang labaw labot sa hitabo, hinungdan nga ilaha nalang kining gipa-blotter.
Wala sab nag-duhaduha nga mi-post sa ilang Facebook page ang tagdumala sa litsonan sa mga hulagway sa maong lalaki nga kuha sa ilang closed-circuit television (CCTV) camera.
Gisaysay sa tagdumala sa litsonan nga wa sila magdahom nga mangingilad ang maong lalaki gumikan sa postura niini nga daw adunahan.
Ang maong kaso anaa sa General Investigation Section (GIS) sa San Pedro PNP.