(UPDATED) -- Gipusil patay ang usa ka mekaniko sa wala mailhing mamumuno atubangan sa usa ka mamaligyaay ug piyesa sa awto sa may dalan A. Del Rosario, sa Barangay Mantuyong, siyudad sa Mandaue, adlaw'ng Sabado sa hapon, Marso 9.
Nailhan ang biktima nga si Michael Remulta, 32 anyos, ug residente sa dalan Plaridel, Barangay Alang-Alang, sa maong siyudad.
Sa pakisusi sa mga imbestigador sa Centro Police Station nga gipanguluhan ni Police Master Sergeant Marino Lofranco, si Remulta kay nag-ayo ug usa ka motor kuyog sa iyang kauban nga mekaniko sa dihang giduol kani sila ug usa ka wala mailhing tawo nga nagsul-ob ug half-face helmet ug bonnet mask.
Sa way pagduha-duha, gibunlot sa wala pa mailhing tawo ang iyang pistola ug gipusil si Remulta sa makadaghang higayon.
Paghuman niyag pusil ni Remulta, nidagan ang maong suspetsado sa iyang kauban nga nagsakay ug motorsiklo ug dayun sutoy pagawas sa maong lugar.
Mga sakop sa Accident Control and Emergency Response Team (ACERT) nisuway og luwas sa biktima apan nakabsan kini sa kinabuhi.
Nakakuha ang mga imbestigador ug 14 ka kabhang ug lima ka slug sa .45 calibre pistol ug usa ka motorcycle nga walay plate number.
Blanko pa ang mga kapulisan sa unsay motibo sa pagpatay ni Remulta.
Si Lofranco niingon nga susihon pa nila ang background sa maong biktima. (FMD)