NAPUNO sa kangitngit ang kalibotan sa usa ka inahan human nga nahanaw ang kahayag sa iyang panan-aw, apan wala kini nawad-an og paglaom ug gani nagmapasalamaton gihapon kini sa nahitabo.
Dili ikalimod ni Gracia Cajegas, 36, taga Macanhan, Barangay Carmen, dakbayan sa Cagayan de Oro nga nahugno ang iyang kalibotan dihang dili na kini makakita niadtong nag-edad pa lamang kini og 12 anyos.
Matud ni Cajegas nga niabot usab kini sa punto kaniadto nga nakahuna-huna pagtapos na lamang sa kinabuhi, apan nagpakalig-on kini ug gisalig ang tanan sa Ginoo.
Giingong niadtong panahona nag-inusara kini gumikan kay nagtrabaho ang mga ginikanan ug igsoon nakahunahuna kini sa paghunos sa kinabuhi.
“Naka attempt man gani ko, lisod gyud, ako ra isa sa balay makahawid ko og kutsilyo makauhunahuna bitaw ko na. Makahawid kog pisi gusto nako ihikot nalang, mag-inom pero makahunahuna pud ko, ayaw kaya ra lage ni,” matud niini.
Gi-angkon usab niini nga naglisod kini sa pagdawat ilabi na nga nakakita kini nga daan gani mga anaa sa lima ka tuig ayha pa niini hinay-hinay nga nadawat ang kahimtang.
Nasayran nga ang kahimtang niini mao ang gitawag nga retina detached dihang nabunal ang ulo niini ug ang retina maoy naapektohan.
“Mag 13 pa ko na blind, retina detached, weak daan akong retina tapos pagka summer to siya nagdula ko unya nabunal akong ulo, ang retina maoy naapektohan gyud,” saysay niini.
Anam-anam na matud nga nahanaw ang panan-aw niini, sa dihang naoperahan nibalik gumikan na usab sa kalingas ug susama nga nabughat kay lage bata paman kini. Ug gani susama nga gikapoyan sa kinabuhi ilabi na nga na-memorized na niini ang trabaho sama sa pagkatulog, kaon ug pagpanglimpyo.
“Anam-anam siya na operahan ko pero nabalik lingas kaayo ba, nahugno gyud, taas man sab akong ambisyon nahugno gyud ang kalibotan gyud,” dugang niini.
Apan karon nakita niini ang ka-importante sa kinabuhi ug dako ang pasalamat gumikan kay bisan pa man sa kahimtang, apan mas maayo pa gani kini tungod kay nakakita pa kini kaniadto. Ug gani nahimamat niini ang iyang kapikas sa kinabuhi diin maoy nagsilbing kahayag lakip na ang ilang 3 anyos nga anak.
“At least pud nakakita pud ko sauna, diri ra sa Cagayan iyang kuya cataract iyang case akong kauban sauna sa pikas grupo, sighted siya, makakita gyud siya, naa koy kaabag siya gyud,” matud niini.
Giingong ang pagsalig lang gyud sa Ginoo ug gani dako usab ang pagtoo niini nga naay plano ang Ginoo kaniya.
“Siguro naa gyud plano ang Ginoo sa ako nga na blind ko and thankful gihapon ko bisan na blind ko kay daghan man gihapon kog na achieved tapos nakatrabaho pud ko the naka meet sab kog laing friends, naka income gihapon,” dugang niini.
Nag-eskwela kini sa eskwelahan alang sa mga blind aron makasulat ug makabasa ug nitiwas sa Alternative Learning System gumikan kay buto gyud niini tapuson ang iyang high school niadtong tuig 2011.
Lakip usab kini sa mga benepisyaryo sa programa sa siyudad labi na ang libre nga NC II.
Ang inspirasiyon niini karong panahona mao ang iyang pamilya ilabi na alang sa ilang anak.
“Karon kay married naman ko makatabang ko sa akong husband nga maka income para sa among baby.”