USA sa mga dali makita sa panapton sa sacerdote sa mga Judeo mao ang turban. Kining tabon sa ilang ulo adunay’ng mitra nga bulawan. Kining mitra maoy gahi nga mora’g korona nga nagakapyot sa ulo. Ug dinhing mitraha, adunay nasulat nga mga pulong - “Pagkabalaan ngadto sa Diyos.”
Ang mga sacerdote o pari maoy mga pinili o espesyal nga mga katawhan. Gipiyalan sila sa Diyos sa pagpataliwala Kaniya ug sa mga katawhan. Kini sila maoy mga representante sa mga katawhan ngadto sa Diyos, ug pinaagi kanila, mahatud ngadto sa Diyos ang mga pag-ampo ug ilang mga hangyo.
Busa, nagakinahanglan kita og mga sacerdote nga magapataliwala kanato ug sa atong Diyos.
Kining mga pari, tungod kay sila maoy representante sa mga katawhan ngadto sa Diyos, ginakinahanglan nga magkinabuhing balaan. Sentro sa ilang pagserbisyo mao ang pagpabilin nga balaan ug matarung diha atubangan sa Diyos. Mao kini ang buot ipasabot sa pagsulat diha sa mitra sa ulo sa mga sacerdote ang inskripsyon nga pagkinabuhing balaan.
Klaro kaayo ang pagkasulti sa Zechariah 3: 4, 5 sa pagsul-ob sa bag-ong biste ni Joshua. Gidawat sa Diyos ang pagkahugaw ni Joshua, apan Iyang gisul-uban og bag-ong biste tungod kay Iya na siyang napalit gikan sa kasal-anan. Unya, sa pagsul-ob niya sa bag-ong sinina, gibutangan pod ang iyang ulo og bag-ong turban nga adunay’ng mitra nga inskripsyon, “Pagpakabalaan ngadto sa Diyos.”
Sa atong pagdawat sa bag-ong kinabuhi nga gisimbolohan sa pagsul-ob sa bag-ong sinina, mao pod ang atong pagkinabuhi og balaan diha sa Diyos.
Mao kini ang kinabuhi natong mga Kristiyano, tungod kay kita usab ang mga representante sa atong Diyos ngadto sa uban nga wala pa nakaila Kanila.
Ang pagkinabuhi og balaan maoy pinakakusgan nga pagpanaksi alang sa atong Diyos. Bisan pa maayo kita magsulti, ang pagkinabuhi sama sa kinabuhi ni Jesu-Kristo maoy mas tuohan sa mga katawhan. Ingon pa ni Tomas, nga nagsulti niining tawhanong pamatasan - “to see is to believe.” Dili motuo kung dili makakita.
Busa, atong ipakita ang matarung nga kinabuhi. Pinaagi niini, mailhan sa mga katawhan kung kinsa ang atong ginatuohan, kung kinsa ang atong Diyos. Ang pagpanaksi ginapakita dili lamang sa pulong, apan sa atong buhat.
Ang kaanindot sa pagkinabuhing balaan ug matarung mao nga ato pong matagamtaman ang maanindot nga mga bunga niini. Adunay kitay kahapsay sa kinabuhi, dili kita makadawat sa pait nga bunga sa pagpakasala, ug magakinabuhi kita nga malipayon. Aduna pa kitay kaseguraduhan sa kaluwasan.
Busa, mga higala, ato kanunay’ng isul-ob ang bulawanong mitra sa pagpakabalaan. Dili kini nato tangtangon, apan kanunay nga atong ipakita kini sa mga katawhan. Unsaon nato kini buhaton? Pinaagi sa pagkinabuhing balaan ug matarung matag-adlaw, ngadto sa Diyos ug ngadto sa mga katawhan.