MAAYONG balita alang sa mga retirado nga nagdawatan og pension ilawom sa Government Service Insurance System (GSIS).
Kini gumikan kay dunay plano ang GSIS nga patas-an ang minimum pension sa mga miyembro sa ilang buhatan. Apan kinahanglan pa kini og pag-aproba ni Pangulong Rodrigo Duterte pinaagi sa ilang giduso nga rekomendasyon ngadto kaniya.
Matud pa sa GSIS nga dunay kinatibuk-ang 67,201 old age ug disability pensioners ang makapahimulos niini nga aprobado na sa GSIS Board of Trustee.
Kon maaprobahan kini ni Pangulong Duterte, matud pa, mo-epekto ang pension hike sugod sa Pebrero karong tuiga.
Sumala pa nga ang maong pension hike wala na magkinahanglan nga patas-an ang binulan nga kontribusyon sa mga miyembro ug wala say negatibo nga epekto sa actuarial life sa pension fund.
Nagpasabot nga ang pag-uyon na lang o pag-aproba na lang ni Presidente Duterte ang gipaabot. Nagpakita sab kini nga duna nay badyet ang GSIS alang niining pension hike.
Kon mahitabo man kini, seguradong malipay ang atong mga kaigsuonang mga pensioner sa GSIS. Kay bisan tuod kon maingon natong nagdawatan sila og pension matag bulan, apan kuwang pa gihapon kini alang sa ilang panginahanglan, ilabi na karon nga mahal na ang halos tanang palaliton.
Gawas pa niini, mapahatan pa intawon ang pension nga ilang madawat alang sa ilang medisina nga mahal na usab karon tungod sa gihambin nilang mga sakit.
Dako na kaayo kini og tabang sa atong mga retirado nga naa nagsalig sa GSIS ug seguradong ila kining ikalipay.