MAGUINDANAO PROVINCE -- Gitakda nga bansayon sa European Union (EU) ang 41 ka mga miyembro sa Moro Islamic Liberation Front (MILF) isip pagpangandam sa transisyon paingon sa bag-ong Bangsamoro Region.
Sumala sa delegasyon sa EU nga nahilakip sa bansayon ang public policy, governance and management nga pagapangunahan sa Center for Peace and Conflict Studies ug Bangsamoro Leadership and Management Institute.
Gipasabot sa EU nga katuyoan sa pagbansay aron nga dunay maayo nga transisyon sa Bangsamoro Autonomous Region in Muslim Mindanao (BARMM).
Una nang giangkon ni BARMM Chief Minister Alhaj Murad Ebrahim nga dili pa sila eksperto sa pagdumala sa lokal nga panggobyerno ug kinahanglan pa nila nga magbansay.
Gawas sa EU, dunay mga eksperto pa nga mga tawo nga gitahasan ni Pangulong Rodrigo Duterte nga motabang sa MILF.
Apil sa mga posibleng moabag sa MILF sa transisyon sa BARMM mao si kanhi OPAPP Secretary Jesus Dureza nga usa sa mga gisaligan sa Presidente nga dako og natabang sa malampuson nga panghinabing pangkalinaw sa Mindanao.
Gihulat na lamang ni Murad kung kinsa ang saligan sa Presidente nga motabang kanila pagpadagan sa BARMM. (Edgar E. Fuerzas)