SUPERBALITA CEBU

Mongaya: Garma ug Osmeña batok drugas

Panahom

ANGAY lang kitang malipay nga magsugod na ang mas hapsay nga koordinasyon tali ni Mayor Tomas Osmeña ug Police Chief Royina Garma sa Syudad sa Sugbo kay atong mapaabot ang mas epektibong mga kampanya batok sa krimen.

Makasabot man ko sa inisyal nga mga bangi tali sa duha.

Ang tigas nga si CCPO chief Garma wa mosunod sa kasagarang mga police chief nga moluhod dayon kon si kinsa ang mayor. Atong nasayran nga si Senior Supt. Garma nakakuha sa respeto ug pagsalig ni Mayor Rodrigo Duterte tungod pa sa iyang performance didto sa Syudad sa Davao.

Gani, tungod sa iyang performance didto sa Davao, dako kaayo ang suporta ni Presidente Duterte kaniya karon.

Kinsa toy nisulti kanako nga duha ka tuig nga nagsigig pahaba si Presidential Assistant for the Visayas (OPAV) Michael Lloyd Dino kang Presidente Duterte kabahin sa ilang bangi kang Mayor Osmeña. Wa gyud makadut.

Apan dihang nitaho si Senior Supt. Garma kang Digong, niulbo dayon ang kaspa sa presidente. Gusto dayong motamparos.

Bisan pa man sa di maayong relasyon ni Garma ug Osmeña, padayon ang sunod-sunod nga kadaugan sa police chief batok sa gidiling drugas dinhi sa syudad. Mao nga wala ko mahibulong nga magkasinabot ra kining duha sa ngadto-ngadto kay pareho man sila og pasyon batok sa krimen.

Akong nabantayan nga ang koordinasyon sa City Hall ug CCPO nagsugod og kahapsay sa miaging mga preparasyon sa Sinulog.

Gawas sa performance sa PNP band sa Sinulog Fair, dalaygon ang security measures nga gipahigayon sa tibuok selebrasyon. Alang kanako, wa kini mahitabo kon padayong dako ang communication gap tali sa CCPO ug Cebu City Hall.

Karong bag-o, atong nabalitaan nga nagkatigum na sila si Sr. Supt. Garma ug Mayor Osmeña kabahin sa peace and order labi na batok sa gidiling drugas sa Syudad sa Sugbo.

Maayo kining maong kalambuan alang sa Syudad sa Sugbo sa akong panglantaw ug di nato barawon tungod lang sa politika. Di ko mahibulong kon makakuha si Garma sa endorsement sa mayor sa wala pa ang pili-ay.

INAYAWAN

Kon atong tukion ang mga dokumento nga naa sa kamot ni Barangay Kapitan Kirk Repollo sa Inayawan, sugod pa sa miaging tuig nga nakig-coordinate na siya sa engineering sa PNP didto sa kaulohan kabahin sa pagtukod sa usa ka police station diha sa usa ka alternative lot sa barangay mga 20 ka metros gikan sa orihinal nga plano niini.

Daghan ang nahibulong nganong niulbo karon ang bangi ug giingong wa kuno makauyon si Kap Repollo nga magtukod og police station.

Di man kini tinuod kon atong tamdan ang mga dokumento. Nalawgaw lang gyud ang kahimtang ug nahimong dakong kontrobersya tungod sa politika. (@anol_cebu sa Twitter)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph