PARI sa usa ka parokya sa lungsod sa Dumanjug, habagatang Sugbo, gipasanginlan nga nimolestiya og usa ka menor-de-edad nga altar server nga babaye nga iyang giingong gigakos ug gihawkan sa ngabil.
Si Cebu Archbishop Jose Palma nikompirmar nga giilisan na ang mao nga pari samtang gihimo sa committee sa artsidyosesis ang imbestigasyon bahin sa reklamo sa 17 anyos nga dalaga.
“The issue has been addressed,” pagseguro sa arsobispo dihang gihinabi sa mga tigbalita bahin niini.
Ang komitiba gipangulohan nila ni Msgr. Rey Penagunda, vicar general sa artsidyosesis ug Msgr. Raul Go, canon lawyer ug laing tulo ka mga kauban.
Sigon ni Palma protocol nila nga ang maong komitiba ang mohimo og pakisusi kon dunay mga isyu nga naglambigit og mga pari.
Si PO3 Irish Buena, pangu sa Women and Children Protection Unit sa Dumanjug Police Station, nibutyag nga ang insidente nahitabo niadtong alas 12 sa tungang gabii sa miaging Dominggo, Marso 3, sud sa rectory sa parokya.
Saysay ni Nene (tinuod pangan gipugngan tungod sa kasensitibo sa pasangil) ngadto sa pulis nga gihatod niini ang vitamins sa pari ngadto sa kwarto niini.
Sa dihang naa na kini sud sa lawak, giagda kini sa pari nga makaon ug gipatan-aw og TV ug giingnan nga kon dukaon isirado lang ang pultahan.
“Giingnan kuno siya ni Father, ari higda ngari. Gipatapad siya og higda. Nihigda pud siya. Mao to gigakos siya, gikisan, mao na hitaboa,” sugilon ni Buena sa Superbalita Cebu base sa salaysay sa Grade 11 nga tinun-an.
“Ayaw ana, Father,” pagpakgang ni Nene sa pari ug dayon nigawas kini sa lawak.
Matod ni Buena, tigdala og kandila si Nene kon naay misa ug sa iyang nahibaw-an, matag Sabado, anha sila maghigdaan sa rectory kay magpraktis para sa misa sa Dominggo.
Ang pulis nidugang nga daghang mga tawo niadtong higayona kay diha usab ang mga miyembro sa choir sa parokya.
Si Nanay Carmen (dili tinuod nga pangan), apohan sa dalaga, nibutyag nga desidido ang iyang apo nga ikiha ang pari nga tulo ka tuig na nga nangalagad sa ilang parokya.
“Ako siya gipakasama nga among pamilya. Giisip na nako siya nga akong anak unya inganaon lang niya akong apo. Bisan kinsa naman sa iyang gibuhat mahiubos gyud, di gyud malipay,” pagpadayag og kahiubos sa ginang ngadto sa pari human sa giingong hitabo.
Si Buena nitug-an nga ang pamilya ni Nene nidangop na sa National Bureau of Investigation nga mao nay mopasaka og kasong acts of lasciviousness in relation sa Republic Act 7610 batok sa pari.
Siya nidugang nga niadtong Biyernes lang, Marso 8, nagpa-blotter ang dalaga kuyog sa iyang pamilya sa ilang police station human kini mahiling sa Pink Room sa Vicente Sotto Memorial Medical Center (VSMMC).
Sumala ni Nanay Carmen na-trauma ang iyang apo sa nahitabo ug naa kini karon sa kustodiya sa Department of Social Welfare and Development (DSWD).
“Magul-anon siya. Maila nimo siya nga naay problema. Didto na siya mosulti sa iyang maestra,” dugang saysay sa lola.
Samtang, sumala pa ni Palma wala pa i-assign og parokya si Padre Decoroso Olmilla, kanhi kura paroko sa Nativity of Mary Parish sa Canduman, dakbayan sa Mandaue nga gipasanginlan nga namunal ug namatid sa 15 anyos nga anak sa cook sa kumbento. Wala pa usab resulta sa pakisusi sa komitiba sa reklamo batok niini.