NAHIMONG Bitoon sa kagabhion ang mga Filipino atubangan sa baga nga mga NBA fans dihang gipakaylap sa Pinoy Basketball League Teens ang Folk Dance nga Tinikling sulod sa Amway Center.
Kagabii gilansang ang ika-9 nga largest crowd sa Orlando Magic franchise history dihang nagbaha ang mga fans atol sa panagbagat tali sa bisitang Dallas Mavericks diin nitakdo nga ang PBL Dancers ang misalida sa Pre-game show.
Ang Amway Center adunay 18, 500 lamang nga seating capacity apan kagabii mikabat sa 19, 196 diin milapas sa 696 ka fans ang misaksi sa nagkainit nga 2018-19 Season.
Apan ang subra sa 200 ka mga Filipino sulod sa Basketball arena ang labing bulahan, gibayaw ang mga kasing kasing ug nagmalipayon sanglit ang nahisgutang gabii gipahinungod sa NBA alang sa mga Pinoy “Heritage Night”.
Gikataho nga ang Orlando Magic Entertainment Personnel & incharge misaludo sa ka mabulukon sa nahisgutang sa sayaw nga walay paglubad sukad pa Spanish colonial era.
Ang mga anak sa magtiayong Cebuano Famous Sinulog Dancers nga si Buging ug Val Sandiego nga sila si Angelica ug Anna Sandiego ang nagsilbing choreographers kagabii sa Tinikling Dance.
Ang mga inilang mga PBL Teen Dancers sa Orlando (The City Beautiful) sa Florida (Sunshine State) sa Ameika naglangkob nila ni Lynelle Mosqueda, Skyler Phan, Timothy Roz, Sophia Paray, Nayla Jiminez, Kayla Kho, Ian Dominguez, Ken Kho, Kristan Parreno, Zachary Roz, Micah Tan, ug Nikka Parreno.
Atol sa kalihukan 100 percent sa attendance ang mga hardworking officers sa PBL diin si Chad Roz (President), Armel Mosqueda (VIce-Pres), former PBA Edward Naron (Commissioner), Lei Aranas Mosqueda (Secretary), Joy Quinain (Treasurer).
Naglangkob sa PBL Board of Directors sila si Ted Quinain, Buddy Alo, Crisner Gonzales, Eric Dominguez, Richard Gutierrez ug Charl Teofilo.
“Manghinaot mi nga daku-dako ang PBL Night next year, would be on Saturday kay weekend ra kalugar ang mga Pinoy diri tungod sa trabaho. Hopefully Lakers, Warriors, Cavaliers or Miami in 2020, depende “matod ni Roz sa Superbalita Cebu.
Sanglit ang NBA mikita’g $7, 000 gikan sa mga Pinoy nga misaksi sa Magic vs Mavs game busa mi offer kini sa PBL nga paduwaan kini bali’g tulo (3) ka oras nga libre sa Amway Center karong Marso 24 Domingo ala 1:00 pm - 4:00.
“We will do a better job next year” hamubo apan pintok nga pamahayag sa corporate secretary sa PBL nga si Lei.
Sa nahisgutang kumbati ang ranked 9th sa Eastern Conference nga Orlando Magic mipukan sa 13th seeded sa Western Conference Dallas Mavericks, 111-106 diin ang Magic gipangulohan ni Terrence Ross nga adunay 22 puntos. (Daniel Quindao Guden, US Correspondent)