IPAHIGAYON ang solidarity walk for peace diin tumong niini ang malinawon, hapsay ug limpyo nga eleksiyon karong umaabot nga Marso 16 sa Kiosko Kagawasan, Divisoria, Siyudad sa Cagayan de Oro.
Ang solidarity walk for peace dunay tema nga “Lakad Tungo sa Kapayapaan ng Halalan at Pamayanan.” Langkoban kini sa nagkadaiyang grupo sama sa relihiyoso, mga tunghaan, unibersidad, lumad ug uban pa.
Gilangkoban ang gipahigayong press conference sama sa relihiyosong grupo pinaagi nila ni Bishop Loreto Lugatiman Jr., president ug founder sa Jesus Christ Chief Cornerstone Global Ministries Inc., Bishop Jose Roy Rodriguez, president ug founder sa Unified Christian Churches of Mindanao, Abdul Mohaimen Hamid National Commission on Muslim Filipinos (NCMF-Northern Mindanao), Nestor Banuag Jr., chapter coordinator National Citizens' Movement for Free Elections (NAMFREL) ug Roberto Villaluz sa Parish Pastoral Council for Responsible Voting (PPCRV).
Matud ni Police Superintendent Mardy Hortillosa, tigpamaba sa Cagayan de Oro City Police Office (Cocpo), nga tumong niini mao nga mapakita nga ang katawhan sa siyudad dili gusto og gubot ug mapakita ang panaghiusa sa nagkadaiyang grupo sa siyudad.
“Mahitabo ni siya para pagpamatuod nga ang Cagayan de Oro City, ang religious sector, ang atong kapulisan, mga lumads and all the people of Cagayan de Oro dili gusto og samok,” matud ni Hortillosa.
Gidugang pa niini nga ang tumong niini mao gyud ang malinawon nga eleksiyon lakip na niini nga walay pagpamalit ug pagpamaligya og boto.
Samtang gibutyag usab ni Banuag nga maayo kaayo kini nga oportunidad aron mapadayag ang suporta sa mga politico diha sa malinawon nga eleksiyon.
“Maayo kaayo ni nga opportunity para madunggan, mapadayag ang pagsuporta, atong gihandom nga hinaot nga mahitabo nga malinawon ang eleksiyon, nag solidarity walk maayo kaayo nga mensahe ,kalinaw ug kagubot dili ni siya nag gikan sa usa lang ka sector, responsibilidad ni siya sa kinabag-an, sa matag usa,” matud ni Banuag.
Gidugang usab ni Villaluz nga mangompanya sila diha sa paghunong na sa pagpamalit ug pagpamaligya og boto.
“Mangampanya gyud mi, no to vote buying, stop vote buying, my vote is not for sale,” matud ni Villaluz.
Ang maong solidarity walk for peace ipahigayon karong umaabot nga Marso 16, adlaw nga Dominggo alas 7:00 sa buntag gikan sa Rodelsa Circle, Macasandig paingon sa Kiosko Kagawasan.
Dili ipamolitika
Samtang, gipanghimangnoan sa kapulisan ang mga politiko nga dili gamiton sa politika ang maong kalihukan.
“Sa atong politiko hinaot pa unta nga kani nga solidarity walk motambong sila tapos dili nila e-take advantage kining solidarity walk para maka advantage sa ilang pagkampanya,” matud ni Hortillosa.
Nanghinaot usab kini nga ipakita na lamang ang ilang ka sensiro sa ilang pagserbisyo sa katawhan.
“Hinaot unta nga ipakita nila ang ilang ka sensiro nga moserbisyo sila sa katawhan ug mopadayag sa ilang kesensiro nga mamahimong peaceful ang atong dakbayan dili lamang sa election kundili sa tibuok adlaw-adlaw nato nga pagpanginabuhi sa atong dakbayan,” dugang niini.