KAPIN sa P60 milyones nga pekeng sigarilyo ang nasakmit sa National Bureau of Investigation (NBI) ug Bureau of Internal Revenue (BIR) human gi-raid ang usa ka bodega niadtong Marso 7, sa Barangay Kauswagan, Siyudad sa Cagayan de Oro.
Gibutyag ni Patricio Bernales Jr., regional director sa NBI-Northern Mindanao, nga gipasaka na nila ang kaso nga IPR o Intellectual Property Rights violation ngadto kang Shi Zhulian nga taga Fujian, China apan kasamtangang nanimuyo sa Capt. Vicente Roa Street ning siyudad kinsa maoy naabtan nga anaa sa maong bodega.
“Peke gyud na tanan mao ng naay labot ang BIR gyud, nakit-an siya didto sa bodega,” matud ni Bernales.
“So na confiscate nato gipadlock na, IPR man atong gi file so kinahanglan pa tag mga affidavit, violation of the intelectual property kay ila man gikopya ang atong produkto kay naa may mga tag-iya ani nga mga brands sa Pilipinas,” dugang niini.
Matud usab ni Alberto Daba Jr., hepe sa investigation unit sa BIR, nga nasuta nga pareho lamang ang mga serial number sa stamps sa maong mga sigarilyo ug minilyon ang alkansi niini sa gobyerno.
Giingong taod-taod na nila kining gisundan ug nakahigayon sa paglusob o spot surveillance pinaagi na usab sa gi-isyu nga surveillance order.
“Cigarettes bare the BIR stamps but it turns out to be fake, the most common observation that we have, they bare the same serial number,” matud ni Daba.
Gi-andam na matud sa tinugyanan sa NBI ang tukmang kaso nga ipasaka sa maong suspek ug sa mga kauban niini.
“For further investigation wala pa man ta ka inquest, anytime apil siya sa kaso, regular filing, naay mga ngalan duna man gud sila’y papel kay murag incorporators ba, apilon nato to,” dugang ni Bernales.
Ang maong mga sigarilyo matud dunay mga marka sa brand nga gipanag-iyahan sa Philip Morris Fortune Tobacco Corp. (PMFTC) ug Japan Tobacco Industry (JTI) diin lakip sa mga nakumpiska nga magsigarilyo nagdala sa brand nga More, Fort, Mighty ug Marvels.