DUNAY gibalita nga mohugpa na usab ang El Niño sa atong nasud, gibanabanaan nga karong bulan sa Mayo, o di kaha sa bulan sa Hunyo, diin gikompirma kini sa Philippine Atmospheric, Geophysical and Astronomical Services Administration (Pagasa) weather bureau; taas-taas daw kining maong huwaw dinhi sa Pilipinas.
Wala paman kini miabot, pero didto sa Manila nagpahimangno na ang Metropolitan Waterworks and Sewerage System (MWSS) ngadto sa mga konsumante nga mangadam sa usa ka hataas nga huwaw nga kinahanglan nga pagdaginot ug dili mag-usik usik sa tubig tungod sa umaabot nga ting-init.
Medyo kabado ang MWSS tungod sa gibalita nga bagyong Wutip, apan maayo gani kay natunaw ra didto sa lawod sa Pasipiko; dali raba nga mukunhod ang tubig IPO Dam, Angat ug La Mesa Dam.
Hinuon, pwede man nila magamit ang tubig sa Laguna Lake, kon dili ko masayop gisugdan na kini nila pagamit niadto pang milabay nga tuig.
Mao kini ang atong nahibaw-an bahin sa pagpangandam sa MWSS ug ang konsisyon sa Manila Water ug Maynilad didto sa kaulohan.
Dinhi sa ato, ang Davao City Water District (DCWD) maoy pinakalami ug giila sa tibuok kalibutan tungod sa iyang taas nga kalidad kon tubig ilimnon ang hisgutan gikan sa mga aquifers.
Ang aquifers, nagagikan sa ilawom sa yuta ug ang istraktura pulos kabatuan nga maoy silbing deposituhan sa tubig gikan sa kabukiran nga mudagayday ilawom sa yuta paingon sa aquifers.
Ang puas nga pagbomba, angay na natong likayan kay muabot ang dakong trahedya sama diha sa Dumoy kay dili gyud kalikayan muabot ang panahon nga masudlan kini’g parat nga tubig gikan sa dagat ang aquifers, ilabina haduol ra kaayo sa dagat ang Dumoy.
Mao kini hinungdan nga ang DCWD ug ang Apo Agua Infrastructura Corp. nga gilankuban sa Aboitiz Equity Ventures ug JV ANGELES Construction, gimugna ang Bulk Water project.
Pinaagi niini atong pasalamatan ang Watershed Management Council, ang DCWD board of directors ngapinangulohan ni Chairman Ed Bangayan lakip niini ang management team Edwin Regalagado sa ilang pagpakabana sa pagpadayon sa pagbantay ug pag-konserba sa atong watershed area, -- kining tanan alang sa atong umaabot pa nga heherasyon.
Ang Tamugan ug Panigan rivers halos 50-kilometros ang gilay-on gikan sa sentrong bahin sa siyudad sa Davao. Sa atong nasayran, ang bulk water mobalor kini og P12.5 bilyon ang maong project, sa sinugdanan mohatag kini og 300 milyon ka letro nga tubig alang sa nagkosumo og tubig tibuok Davao City.
Atong pasalamatan ang atong halandong Presidente Rodrigo Duterte, ug si Davao City Mayor Sara Duterte-Carpio sa pagmahal sa katawhang Dabawenyo sa ilang pagsuporta sa tanang mga proyekto nga makahatag og kaayohan kanatong tanan.