PADADA, Davao del Sur - Usa ka 66-anyos nga lalaki ang gideklarang dead on arrival sa provincial hospital human gipusil sa ulo sa riding-in-tandem luyo sa pagpatuman sa election gun ban ug mga police checkpoints sa mga entrada ug pagawas nga bahin sa Davao del Sur, Sabado sa gabii, Marso 9.
Ang biktima nga nailhang si Felix Camarino Sarabillo, minyo, wa'y trabaho, kinsa gipusil alas 9:00 sa gabii, didto sa Purok 6, Brgy. Southern Paligue.
Si SPO1 Aaron Acosta, ang imbestigador sa kaso nagbutyag nga kagahapon sa buntag, adunay deperensya ang tuong parte sa tiil sa biktima, naglingkod gawas sa balay sa iyang silingan mga 30-metros ang gilay-on gikan sa iyang balay.
Nasayran nga naghuwat ang biktima sa iyang anak nga babaye kay moadto sila sa siyudad sa Digos aron magpahilot.
Wa magdahom ang biktima nga kalit moabot ang duha ka de-motorsiklong suspek ug ang backrider abtik nga mikanaog dayon wa'y daghang rason namusil, mga 35-metros ang gilay-on asa naglingkod si Sarabillo.
Gisuwayan pa pagdala ang biktima sa Davao del Sur Provincial Hospital apan wa na matabang sa mga doktor.
Ang mirespondeng kapolisan igo na lang nakarekober og duha ka tingga ug duha ka basyong bala sa kalibre .45 pistola.
Si Acosta di pa makasulti sa motibo sa insidente ug bansagon sa mga suspek samtang padayon ang lawom nga imbistigasyon. (Orlando B. Dinoy)