KIBLAWAN, Davao del Sur - Gitambungan sa mga opisyal sa lugar ug mga opisyal sa kapolisan ang gihimong pagdabdab sa marijuana nga gipangunahan sa Philippine Drug Enforcement Agency sa Davao (PDEA-11) niadtong Sabado, Marso 9.
Mokabat sa P2 milyones ang kantidad sa marijuana gikan sa plantasyon nga naibot sa otoridad didto sa Sitio Notong, Barangay Kimlawis, niadtong Marso 7.
Gisaksihan sab ni Kiblawan Mayor Carl Jason Rama ang gihimong aktibidad sa otoridad.
Si Rama mihangop sa gihimo sa kapolisan aron masumpo na ang pagpananom niini sa kabukiran sa Kimlawis.
Gihagit sab sa mayor ang kapolisan nga pangitaon ang mga suspek aron makasohan sa korte.
Si Senior Inspector Robert James Carumba, nagbutyag nga paningkamotan nila nga mahurot na ang mga marijuana sa ilang area of responsibility (AOR) ug sikupon ang suspek.
Ang lugar sa Kimlawis maoy nailhang tamnanan og marijuana sa DavSur hinungdan nga hugot na karon ang pag-monitor sa lugar ug ang pakig-koordinar sa mga opisyal sa barangay.