ANG pag-asenso sa kinabuhi mag-agad sa kakugi ug panglantaw sa tawo. Busa, kon aduna kitay mga pangandoy, ato gyung trabahoan sa tumang kakugi, dili lang magsalig sa uban aron kini makab-ot.
Ako si Teofista Apura, 58, taga Upper Tawog, Valladolid, Carcar City, Cebu. Nagdako ko sa kapobrehon. Kay sayo man nibiya ang among amahan, bata pa lang nakat-on na ako sa pagtrabaho sa uma kauban ang akong inahan ug mga igsuon.
Pag-edad nako og 19, naminyo ko ug nakabaton og tulo ka mga anak. Lisod ang among kahimtang kay construction worker ra ang akong bana ug nagtindatinda lang ko og bugas sa among gamay nga sari-sari store. Bisan pa sa tanan, nisalig ko nga ang tanang butang sa kalibotan adunay katuyoan ug padayong nagkugi.
Tuig 2000 nisulod ko sa pagnegosyo og baboyan dihang nakatigom ko og kwarta gikan sa among gamayng sari-sari store ug nakaapil sab ko sa RAFI Micro-finance, Inc. Nagsugod ko sa kapital nga P10,000 og ako kining gidapat sa pagpundar sa akong baboyan. Sukad niadto, medyo nakaluagluag kami sa akong pamilya. Nakat-on sab ko sa pagtigom sa sobra sa among halin aron aduna kamiy tinigoman alang sa mga emerhensiya.
Sa ngadto-ngadto nagbunga ang mga kahago namo sa akong bana kay nakapalit kami og 1,400 metriko kwadradong yuta nga gigamit sa pagpadako sa among baboyan. Nagamit sab namo ang luna sa among sulod sa pagluto og litson.
Sukad niadto, dako gyud ang nahitabong kausaban sa among kinabuhi itandi sa una Dili na kami mabalaka asa mokuha sa among pang-adlaw-adlaw nga panginahanglan. Ug kaluoy sa Ginoo napahuman sab namo sa akong bana sa pag-eskuyla ang among mga anak. Karon, makaingon gyud ko nga sakto ko sa akong pagtuo nga ang pagkab-ot sa atong pangandoy nga haruhay nga kinabuhi mag-agad sa atong pagkugi sa pagtrabaho.
Akong tambag sa mga nagnegosyo ug gustong magnegosyante sama nako nga tumanon gyud nila ang ilang mga katungdanan ug ampingan ang ilang mga kustomer—kay sila man ang naghatag og kinabuhi sa negosyo.
Isip panapos, ako moingon nga naa ra gyud sa atong mga kamot ang kalamboan sa atong kinabuhi.