KOMPIYANSA si kanhi Mayor Michael Rama nga nawala na maapil sa bag-ong narco-list nga hugonhugon nga ipagawas sa Department of Interior and Local Government (DILG) ning semanaha.
Matod ni Rama, nakasumiter na siya sa mga dokumento ngadto sa Philippine Drug Enforcement Agency (PDEA) nga nagpamatuod nga dili protektor sa lokal nga sindikato sa gidiling druga.
Apan wala gibtuyag ni Ram kon unsang mga dokumeto ang iyang gisumitr sa PDEA.
Sumala sa Department of Interior and Local Government (DILG) sa kaulohan, dynay 84 ka pangalan nga naa sa ilang gitawag og narco-list.
Si Rama naapil sa ginganlan ni Presidente Rodrigo Duterte niadtong tuig 2016 nga nalambigit sa druga isip protektor.
Sukwahi sa uban, sukad sa pagka-publikar sa iyang pangalan, wala na mahinganli og balik si Rama sa mga dagkong kalihukan nga gitambongan ni Duterte.
Sila si Peter Lim ug Mayor Vicente Loot sa Daan Bantayan ang kanunay isingit sa pangulo sa iyang pakigpulong hilabi na kon mahisgutan ang shabu.
Si Rama maoy running mate ni Bise Mayor Edgardo Labella nga standard bearer sa Barug-PDP-Laban sa pagka-mayor sa dakbayan sa Sugbo diin ang ilang kandidatura gisuportahan ni Duterte.
Samtang, si Senador Cynthia Villar, dinhi sa Sugbo para pagtambong sa kalihukan sa Cebu Peoples Multipurpose Coop, niingon mga angayan nga siguraduhon sa DILG ang mga pangalan nga tinuod nalambigit sanglit kon dili tinuod, makaluluoy ang maong pulitiko ug uyon sa pagpasaka og kaso una. (PAC)