Mga uyab sa 'Drug Queen' gilungpong

YGOT DRUG MATRIX: Ang Police Regional Office (PRO) 7 niluwat sa kutay sa sindikato sa negusyo sa gidiling drugas sa Sugbo sa grupo ni Rustico Ygot, kinsa tua nabilanggo sa National Penitentiary sa Muntinlupa sa kaulohan. (Gikan sa PRO 7)
YGOT DRUG MATRIX: Ang Police Regional Office (PRO) 7 niluwat sa kutay sa sindikato sa negusyo sa gidiling drugas sa Sugbo sa grupo ni Rustico Ygot, kinsa tua nabilanggo sa National Penitentiary sa Muntinlupa sa kaulohan. (Gikan sa PRO 7)

ANG lovelife ni Jocelyn “Joy” Encila, gitumbok sa kapulisan nga drug queen sa Cebu, adunay dakong kalambigitan sa iyang estado sa kalibotan sa illegal drugs.

Lakip sa iyang mga nauyab ang duha ka big-time drug lords sa Central Visayas, duha ka aktibong pulis, ug usa ka sakop sa Philippine Coast Guard (PCG).

Si Encila nadakpan niadtong Marso 4 sa buy-bust sa Consolacion, Cebu. Minilyon ang balor sa shabu nga nasakmit gikan kaniya.

Si Encila, kapin 30 anyos, adunay usa ka anak ni Jake Arglo Garces, lumad nga taga Barangay Lamac, Consolacion, nga nabilanggo kaniadto sa New Bilibid Prison (NBP) didto sa Muntinlupa City sa Luzon, sa kasong murder ug nalambigit usab kini sa illegal drugs. Ang ilang anak 13 anyos na karon.

Sa dihang naa pa si Garces sa sulod sa NBP, nakarelasyon si Encila sa usa ka sakop sa PCG Cebu Station ug adunay sila'y duha ka mga anak.

Nagsugod ang kalambigitan ni Jocelyn sa illegal drugs sa dihang nakaipon si Garces sulod sa kapin 13 ka tuig.

Gikan sa pagka-pusher, si Garces nahimo nga drug lord tungod sa paglambo sa iyang negosyo sa drugas.

Apan nadakpan si Garces human malutsi og warrant of arrest sa kasong murder.

Iyang napusilan-patay ang macho dancer nga si Gabriel Dayondon, 23, sa Cheetah Gay Bar sa Capitol Site, Cebu City, niadtong Abril 18, 2010 tungod sa pangabubho.

Samtang nabilanggo si Garces sa NBP, nauyab ni Encila ang sakop sa PCG. Apan, padayon ang komunikasyon nila ni Encila ug Garces.

Usa ka higayon nga nibisita si Encila ni Garces sa NBP, iyang nakaila si Rustico Repuela Ygot.

Si Ygot giila nga leader sa Ygot drug syndicate nga naglihok sa probinsya sa Sugbo. Aduna siyay koneksyon sa dakong drug player sa nasod nga mao karon ang naghatag kaniya og supply sa illegal drugs nga ipadala sa Metro Cebu.

Dinhi nagsugod ang relasyon ni Encila ug ni Ygot. Giingong dunay higayon nga si Encila didto na matulog sa selda ni Ygot. Sukad niadto, ang tanang transaksyon sa illegal drugs nga gikan kang Ygot ipaagi na kang Jocelyn.

Bisan sa iyang padayon nga relasyon ni Ygot, si Encila nailaila na sab ang usa ka pulis nga nag-ranggo pa og Police Staff Sergeant nga nadestino sa Cebu City Police Office (CCPO).

Sa gihimong intelligence investigation, ang Staff Sergeant maoy nagsilbing protektor ni Encila bugti sa dakong kantidad ug lawasnong kalipay.

Apan wala usab kini magdugay human ang usa ka bagitong pulis nga nagranggo og Police Corporal nga nadestino usab sa CCPO, ang nisulod sa kinabuhi ni Encila.

Si Corporal maoy team leader ni Staff Sergeant.

Sigon sa usa ka kasaligang tinubdan sa Superbalita Cebu, hapit magpinusilay silang Staff Sergeant ug Corporal sa dihang nahibaw-an nga giuyab ni Corporal si Encila bisan uyab sila ni Staff Sergeant.

Milambo ang kinabuhi ni Corporal nga suod nga higala ni Jinnefer Mercader, ang barangay kapitan sa Logo sa lungsod sa Borbon, Cebu.

Si Mercader niangkon nga usa siya ka hit man nga bag-o lang nakaikyas sa Medellin District Jail.

Gawas sa iyang pagka-hit man, nalambigit usab si Mercader sa illegal drugs nga gituohan nga gikan ni Encila.

Sa drug matrix nga gihatag sa Regional Intelligence Division (RID) 7 sa media, si Ygot ang nagsilbing drug supplier sa Sugbo ug si Encila ang iyang direktang hulgan sa supply.

Si Encila na ang mo-deliver kon kinsa ang iyang hatagan niini, sama sa iyang laing uyab nga pulis nga nadestino sa CCPO, ug ang sibilyan nga si Elymar Ancajas.

Ang direktang downline ni Encila ang usa ka pulis, kinsa iya ra pud nga ig-agaw nga nadestino sa Bohol apan lumad nga taga Tangke sa dakbayan sa Talisay City, ug Elymar Ancajas nga nadakpan sa Pardo police station ug nakuhaan og 18 ka kilos nga shabu.

Samtang ang iyang sinaligan nga si 'Bohol Pulis' maoy mo-supply sa drugas sa manghod ni Encila nga si Janelyn ug sa iyang ig-agaw sa Duljo Fatima, Cebu City.

Lakip ang kanhi pulis nga si PO1 Wlfredo Cabillo nga nadakpan pinasikad sa warrant of arrest nga giluwatan ni Judge Anacieto Debalucos sa Regional Trial Court (RTC) Branch 17 sa Cebu City.

Matod ni RID 7 chief P/Col. Remus Medina, iyang sutaon kon aduna bay kasayuran si 'Coast Guard' sa illegal drug trade ni Encila.

“Marami (si Encila) nga naging karelasyon na mga nasa gobiyerno pa..." matod ni Medina.

Nagduda ang Police Regional Office 7 sa gipanag-iya nga kabtangan ni 'Bohol Pulis.'

Aduna kini dakong farm sa Barangay Basak, Cebu City ug dakong piggery sa lungsod sa Alegria, Cebu.

Ang gipanag-iya ni Encila nga duha ka dagkong balay sa mga lungsod sa Compostela ug Consolacion ang gipasusi na sa legal division sa PRO-7.

Matod ni P/Maj. Gerard Ace Pelare, hepe sa Consolacion Police Station, adunay tulo ka sakyanan ug usa ka dakong balay ang giangkon ni Encila.

Si Encila nagpuyo sa usa ka private subdivision sa Barangay Casili, Consolacion.

Nakig-alayon na ang kapulisan sa Anti Money Laundering Council (Amlac) aron mabuksan ang bank records ni Encila. (B)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph