LAKIP sa mga saad sa mga politiko sa kampanya mao ang paghaw-as sa katawhan gikan sa pagkakabus ug kagutom. Ang pasiaw mao nga sulbaron kini sa mga politiko pinaagi sa paglawog sa mga kabus ngadto sa gipanggutom.
Ang mga ekonomista moingon nga masulbad ang kagutom ug kalisod pinaagi sa paghatag og trabaho ngadto sa katawhan. Ang uban miingon nga mas dali nga solusyon ang paghatag og kuwarta ngadto sa mga kabus aron kon gutmon, duna silay ikapalit og makaon.
Ang tanang tawo bation og kagutom, kanang magkutoy ug maghapdos na gani ang imong tiyan ug usahay modaguok pa. Apan ang mga adunahan nga gutumon inig ka buntag mamahaw og “ham and egg.” Ang kabus tawon, igham ra.
***
Gilusad niadtong Miyerkules sa Italy ang ilang gitawag nga “citizen’s income,” programa sa ilang gobyerno nga maghatag balig P46,000 matag buwan sa beneficiaries.
Ang tumong sa maong programa mao ang pag-undang sa pagkakabus sa kapin sa lima ka milyon ka mga Italyano, lakip sa mga langyaw nga tua na nagpuyo didto.
Bisan kadtong way trabaho, dunay basic income nga 780-euro o 880 dolyares kada buwan.
Ang citizen’s income usa ka matang sa unconditional cash transfer. Ang tumong niini mao nga suportahan sila hangtod nga makakita silag trabaho. Molihok sab ang ekonomiya kay silay ikagasto.
***
Dinhi sa Pilipinas, duna sab tay unconditional cash transfer. Ginagmay ra hinuon. Tungod sa pagpatuman sa Tax Reform for Acceleration and Inclusion (Train) Law, mokabat sa 1.8 milyones ka mga beneficiaries sa 4Ps ang nakadawat og P200 kada buwan sugod 2018.
Umentohan pa ang ilang madawat sa P300 ang buwan karong tuiga ug sa 2020. Ang beneficiaries sa 4Ps kon Pantawid Pamilyang Pilipino Program magdawatan na og health grant nga P500 kada buwan matag pamilya ug P300 sa matag anak.
Layo ra ni sa tag P46,000 sa Italy. Unsa kahag mahitabo ni sa Pilipinas no? Di kaha iprenda gihapon sa benenficiaries ang ilang ATM sa loan sharks?