STAY neutral always. Just do your job.
Kini ang apelar ni Cebu Governor Hilario Davide III ngadto sa kapulisan sa lalawigan sa Sugbo atol sa ilang courtesy call ug Operations Lawmen Awarding Ceremony sa Kapitolyo pagka Lunes sa buntag, Marso 11.
Ang gobernador nihangyo sa mga pulis nga mga sakop sa Cebu Provincial Police Office (CPPO) nga dili magpagamit sa mga pulitiko.
“Ayaw mo pag-apil-apil sa kampanya sa mga pulitiko... Likayan lang gyud nato ang pulitika karon umaabot nga eleksyon, nagsugodsugod na ra ba ang kampanya sa lokal,” si Davide nihangyo atubangan sa mga pulis.
Iyang gipahinumdoman ang mga pulis nga kanunay motuman sa ilang katungdanan ug sa balaod lang modapig.
Iya usab gipamatngonan ang mga pulis nga buhaton ang angay nga himuon nga maoy ilang gipanumpaan ug motuman sa mando ni CPPO Director Manuel Abrugena.
Sumala ni Abrugena nga ang pagpabilin nga neutral maoy gibuhat sa iyang mga sakop ug kini usab ang gitugon ngadto kanila ni Police Regional Office (PRO) 7 Director Debold Sinas.
“We are protecting not only politicians campaigning but the attendees or participants ng mga political activities,” tubag sa provincial director sa pangutana kon duna bay mga pulis nga magkuyogkuyog sa mga kampanya sa mga pulitiko.
Sa Operations Lawmen Awarding Ceremony, gipasidunggan ug gihatagan og incentives ang 131 ka mga pulis sa unom ka police stations ug Provincial Intelligence Branch (PIB), apil si Abrugena, gumikan sa ilang malampuson nga mga operasyon batok sa gidili nga drugas.
Apil sa gipahalipayan ug nakadawat og insentibo ang mga pulis gikan sa mga siyudad sa Naga ug Bogo ug mga lungsod sa San Fernando, Minglanilla, Balamban ug Borbon.
Sa 38 ka mga operasyon nga ilang nahimo, niabot og 4,200 ka gramos sa shabu ang nasakmit nga gibanabanang mobalor og P47.4 milyones.
Di mominos sa P1,000 ug pataas ang nadawat nga insentibo sa mga pulis nga niapil sa mga operasyon batok sa gidili nga drugas.
Sumala ni Carmen Remedios “Ivy” Durano, executive director sa Cebu Provincial Anti-Drug Abuse Office (Cpadao) ang Operations Lawmen, usa ka programa sa Dangerous Drugs Board (DDB) nga naghatag og insentibo sa mga pulis sa ilang malampuson nga mga operasyon batok sa mga nalambigit sa illegal drugs nga ilang gisagop ug maoy ilang gitamdan sa paghatag og insentibo ngadto sa mga pulis sa lalawigan.