TULO ka mga lalake ang gitumbok sa usa ka saksi nga maoy nipatay sa 16-anyos nga dalaga nga napalgang patay ug nakalabira na ang nawong kay gilaplapan.

Ang saksi nga usa ka person with disability nangangkon nga nakakita siya sa hitabo mga alas 2 sa kaadlawon sa Lunes sa sitio Mayahay, Barangay Bankal, Dakbayan sa Lapu-Lapu.

Ang biktima nga si Christine Silawan, taga sitio Soong, Barangay Mactan, kinsa wala nay sapot sa paubos nga bahin sa lawas sa dihang napalgan, giila sa iyang inahan nga si Lourdes.

Matod sa 32 anyos nga ginang nga saksi nga tungod sa iyang paglaag, nakaadlawnan siya sa pagpauli.

Sa dihang naagi siya sa dapit diin napalgan ang lawas ni Silawan, usa ka itom nga motosiklo ang iyang nakit-an.

Iyang nakit-an ang usa ka babaye ug tulo ka mga lalake.

Dugang sa saksi nga nakakita pa siya nga nidagan palayo ang biktima gikan sa tulo.

Apan giapas siya sa tulo nga nagsakay og motorsiklo.

Usa sa mga lalake nibira sa sling bag ni Silawan hinungdan natumba ang biktima.

Dali usab sa usa sa mga lalake nitabon sa baba niini dayon ang usa ang nidunggab-dunggab sa liog ni Silawan.

Nakita pa usab sa saksi nga gi-rape kini ug gipanitan ang nawong ni Silawan.

Matod sa saksi nga nakatago siya sa adunay bundo nga yuta, nga parte sa dakung hawanan sa lugar nga nahitaboan.

Napalgan usab sa lugar, ang sapatos niini, sayal, short ug pants nga giila sa inahan nga iya ni Christine.

Gi-autopsy ang lawas sa dalaga aron pagkompirmar kon gi-rape ba siya sa wa pa patya.

Gihulagway ni Lapu-Lapu City Police Director Lemuel Obon nga luog kaayo ang pagkapatay ni Silawan.

“Ako I’ve been investigating a lot of cases, nga gipangpatay. Pero this one, dili ko katutok sa patay, gory kaayo ang pagkapatay. Kini ang worst nga atong girespondehan,” paghulagway ni Obon.

Matod ni Obon nga nakadawat sila og taho kalabot sa napalgan nga lawas sa dalaga sa maong lugar pasado alas 6 sa buntag.

Personal kini nga gisusi sa direktor, kinsa nihulagway nga linuog ug walay tawo nga anaa sa tarung nga panghunahuna ang makabuhat sa ingon.

Gihulagway ni Obon ang lugar nga mingaw ug nga 100 metros pa una ang mga balay.

NAKAKITA

Giimbitar sa kapulisan ang usa ka PWD, kinsa nitug-an nga nakakita sa panghitabo.

Ang saksi niingon nga nakakita siya sa pagdunggab makadaghan kang Christine ug sa pag-rape ingon man sa paglaplap sa nawong.

Lakip sa gisubay sa pulis ang giingon nga katapusan nga nakita nga nakauban sa biktima niadtong Dominggo.

Gisubay na usab kon aduna bay close circuit television (CCTV) camera sa mga establisemento.

KATAPUSANG KITA

Samtang grabe nga nagminatay si Lourdes Pardillo, kinsa maoy personal nga niila sa iyang anak sa crime scene.

Hinungdan nga hapit makuyapan ang inahan sa dihang nakita ang nahiaguman ni Christine, ug nitug-an nga dili gyud sya makadawat sa nahitabo niini.

Matod niya nga alas 6 Dominggo sa gabii pa nila kini nga gipangita, kuyog ang iyaan ug igsuon sa biktima.

Matod sa inahan nga pasado alas 3, Dominggo sa hapon, Marso 10, katapusan niya nga nakit-an si Cristine, ikaduha sa upat niya ka mga anak.

Nananghid kini kaniya nga moadto sa Sacred heart church sa Barangay Pajac aron pag-serve sa simbahan isip collector sa misa.

Matod niya nga iyang gipugngan ang iyang anak nga dili lang una mo-serve ug mosimba na lang sa simbahan nga duol sa ilaha sa Barangay Mactan.

Apan nihangyo nag dalaga nga tugtan kay alang na usab kini isip parte sa iyang grado sa pagtungha sa grade 9.

Ang misa nga giserbisyuhan sa anak alas 4 sa hapon.

Sud na sa dul-an usa ka tuig na kini nga tulumanon sa biktima ug nga alas 6 usab sa gabii mahiuli na kini sa ilaha.

Naabtan na sila og ala 1, Lunes sa kaadlawon, sa pagpinangita ug nituyo na pag-adto sa Pajac barangay hall.

Gihulagway ni Lourdes si Cristine nga di himarkada, kasagaran balay-eskwelahan-balay o balay-simbahan-balay ang rota sa biktima.

Giingon nga wala usab kini natug-an kaniya og sa mga igsuon kon adunay nangulitawo niini o mga nakaaway ba.

Gitug-an usab ni Lourdes nga sa ilang pagsubay sa tunghaan sa iyang anak, Lunes alas 8 sa buntag sa wa pa niya makita ang nga lawas, iyang nasuta nga nakit-an pa iyang anak nga nagkaon og balut sa unahan sa simbahan uban ang usa ka sakristan nga nagngalan og Ryan human sa misa nga giserbisyuhan niadtong Dominggo.

Dugang ni Lourdes nga sa iyang pagpangutana kang Ryan, namahayag kini nga samtang nangaon og balut, iyang gibiyaan si Cristine kay siya nangihi.

Sa iyang paghibalik, wa na ang biktima.

MOABAG

Si Lapu-Lapu City Mayor Paz Radaza di katuo sa gidangatan ni Cristine.

“Grabe pud ang gibuhat aning tawhana (suspek/s), first time gyud ni nahitabo (Lapu-Lapu),” tipik sa text message ni Radaza.

Atol niining pagsuwat nagpaabot si Radaza sa resulta sa imbestigasyon.

Nisaad siya sa pagtabang sa pamilya human namalihog sa Superbalita Cebu si Lourdes nga pahibaw-on ang mayor nga nanginahanglan sila og tabang.

“Sige kog panawag ron sa tag-iya sa punerarya kay kami na lay magsabot sa mga bayranan,” matod pa sa mayor sa Superbalita Cebu. (dugang taho ni FVQ)