TINUOD ba gyud nga tapolan kining mga trabahanti nga Filipino. Mao ni ang gilalisan karon tungod sa pagluwat og pamahayag ni Ramon Tulfo, ang special envoy sa Pilipinas ngadto sa China.
Lisod sabton no. Kon moingon ka trabahanti, nagpasabot mitrabaho, unya tapolan diay.
Gihulagway ba gyud ni Tulfo nga tapolan ang mga Filipino dihang gi-interbyu siya mahitungod sa pagdagsang sa mga Chinese workers sa atong nasod?
Matod ni Tulfo: “Nahibaw ba kamo nganong mas gusto sa mga developer ang mga Chinese workers? Kugihan. Kanang mga Pinoy workers, way nay pagtahod, moabot sa job site ug didto pa nag-andam sa ilang mga gamit, apan kining mga Chinese andam kanunay – samtang ang mga Pinoy worker manigarilyo pa ug magtabi.”
Dunay punto si Tulfo sa iyang obserbasiyon ug nahitabo kana nga sitwasiyon sa bisan asang dapit sa nasod.
Dili sab ikalalis nga dunay mga trabahanti nga langayan ug magpunay lang og tabi.
Apan, tataw nga wa magpasabot si Tulfo sa mga Filipino nga nanarbaho sa abroad. Busa dili angay moangal si Labor Secretary Sivestre Bello III sa iyang pag-insister nga nabaniog ang mga Filipino workers sa tibuok kalibutan nga dedicated ug diligence sa ilang panarbaho.
Alang niadtong mga overseas Filipino worker, maka-relate gyud sila sa gipangyawit ni Tulfo ug labaw nang makadason sab sila sa baruganan ni Bello.
Dili man gud malalis nga kugihan manarbaho ang mga Filipino sa gawas sa nasod. Gani, ang uban kanila, dunay duha ngadto sa tulo ka mga trabaho sa usa ka adlaw.
Inay atong pugson si Tulfo sa pagbakwi sa iyang gisulti ug mangayog pasaylo, atong isipon iyang pamahayag nga “pagpukaw” sa atong kahimtang sa pamuno sa nasod.
Naggumikan ang pahayag ni Tulfo sa report nga duna nay 169,893 ka mga working permit gi-isyu sa Department of Labor ngadto sa mga langyaw apil na niini ang mga Chinese.
Dunay kabalaka karon nga makuha sa mga langyaw trabahanti ang mga trabaho nga alang unta sa mga Filipino.
Ang pangutana, duna bay gihimong lakang ang gobyerno aron mahapsay kining pag-apod-apod og trabaho ngadto sa langyaw ug sa mga lokal o Filipino?
Sa akong nang giingon, sa ubang nasod giplastar na sila ang balaod nga naghatag lamang og limit sa usa ka establisemento pag-hire og langyaw, ilang gipalabi ang paghatag og trabaho sa mga residenti.
Nakasabot ta nganong daghan ang misupak niining pag-abli sa administrasiyon ni Duterte sa pultahan alang sa mga langyawng trabahanti sa nasod.
Apan, wa ba mo masayod nga bisan sa labing ngilit ug gamayng isla sa Pacipiko dunay Filipino worker. Sa bisan asang nasod sa kalibutan naa kanunay kining mga Pinoy nanarbaho.
Ang ngil-ad paminawon mao nga sama sa ubang mga Chinese workers nga misud sa Pilipinas isip turista unya nanarbaho diay, mao sab na ang gipanghimo sa mga Pinoy ngadto sa ubang nasod.
Ug daghang mga Pinoy workers nga nisud sa mga trabaho nga alang unta sa mga lokal nga residenti didto sa abroad.