KINSAY magtuo nga ang usa ka nurse sa operating room usa na karon ka sikat nga pastry chef ug aduna nay kaugalingon nga tunghaan nga siya pa mismo nangunay og tudlo sa Cagayan de Oro.
Kini mao si Chef Mich Abugado Uapal. Pamilyar nga pangalan siyempre kay anak ni Balingasag Misamis Oriental Mayor Marietta Abogado, apan mas nitatak iyang pangalan tungod sa kaugalingon nga paningkamot ug daghang competition ang nadag-an.
Gisaysay ni Chef Mich kung nganong sa kalit nga higayon mas nagpokos sa baking kaysa mahimong full time nga nurse sa operating room.
“During my academic life I was an average student good enough not to be in the watch lists of the teachers but settled enough not to belong to the crème of the top. But I became a registered nurse,” butyag niini.
Dihang naminyo kini ni Sammy Uapal, lumad nga taga Palawan ug nakabaton ug duha ka anak. Labihan ka subo ang nahitabo sa pamilya niini dihang 2 months pa ang iyang anak na misdiagnosed kini og eczema.
Maayo na lamang nakapangayo sila og second opinion hinungdan nga mirakuloso alang sa ilang pamilya nga walay kamatouran sa giingong sakit nga gihambin niini.
Tungod niadto niundang kini sa iyang pagka nurse aron mas magpokos sa iyang pamilya ug sa pag-atiman sa iyang duha ka mga anak.
Aron sab dili sobra ma bored giaghat kini sa iyang kapikas nga mag-enroll kini og baking ug nag-apil apil sa mga kompetisyon, susama sa sikat nga kumbira matag padangaton ang kapistahan sa siyudad sa Cagayan de Oro.
Naharbat niini ang kampyonato sa live cake decorating nga competition sa tuig 2011.
Pag-abot sa tuig 2012, nilakip kini didto sa national competition sa Philipine Culinary Cup kon diin nadag-an gihapon niini ang kamaayo sa cake decorating. Samtang tuig 2013 midaog kini sa national food showdown o chef wars gihapon sa cake decorating.
Duha na ka mga tuig sa Kumbira nga natigayon nga wala na siya miapil sa kompetisyon apan siya na maoy nag judge niini.
Sweet House Pastry School
Tuig 2014, nakadisisyon silang duha sa iyang kapikas nga magbukas og pastry school nga karon rehistrado ug accredited sab sa Tesda nga mahimong tunghaan sa mga Tesda iskolar nga magtoun sa bread and pastry production.
Gipili sab niini nga magbaton og kaugalingon nga tunghaan aron flexible ang iyang time ug mamanage kini ug ngadto sa iyang pamilya.
Gawas niini aduna sab silay gitanyag nga 6 months ug 3 months alang niadtong gustong sa magtoun sa profession baking pastry art program kon diin gikan sa tuig 2014 moabot na ngadto sa 200 ka mga estudyante ang nakatapos sa ilang tunghaan.
Ang nakanindot sab niini tungod kay bout ni Chef Mich nga tanan niya nga graduates mamaligya gyod human sa ilang natun-an.
“Our aim is entrepreneurial, meaning at the end of the course pwede na sila magbaligya with their own. You can put up with your own business. Bisan gani kana ilang gihimo nga cake gusto nako ilang dalahon sa mga estudyante ug ibaligya,” matud ni Chef Mich kinsa wala gyod naghuna huna og kompetisyon.
Nagtoo kini nga daghan sa iyang mga tinun-an nga mas molambo pa sa iyaha apan iya kining ikalipay.
“Naa gyud na mas maayo pa sa akoa. I stared basic piping naa gyod mas maayo sa ako of course naka learn sila sa ako I am also learning from them,” butyag niini.
Ang tunghaan adunay lima ka mga homegrown chef kon diin graduate ug tinun-an gyod ni Chef Mich samtang duna sab pito ka mga visiting chefs.
Dugang niini nga gawas nga gatudlo siya og mga tinun-an motravel kini sa nagkalain laing siyudad sa nasod kay gatudlo gihapon isip usa ka visiting chef sa lain laing lugar.
Sa pagkakaron ang minimum nga gadawaton nila nga mga tinun-an gikan lang sa walo ngadto 12 o 15 aron ila kining mas mapokosan sa pagtudlo.
Sa kantidad nga P75,000 ngadto P80,000 pwede naka moenroll sa maong tunghaan kon diin libre na ang tanan gikan sa imong uniporme ug hangtod ngadto sa mga ingredients diha sa pagbake.
Gikalipay sab ni Chef Mich nga daghan gaenrol sa ilang tunghaan sama sa mga working moms nga mga professional sama sa doctor, engineer, journalist ug uban pa.
Niadtong adlawng Sabado, Marso 9, ang ilang graduation ceremony kon diin usa sa dinapit nga bisita si Tesda Regional Director Tarhata Mapandi ug Cagayan de Oro City Mayor Oscar Moreno.
Adunay 40 ka mga migradwar sa tuig 2018-2019. (SVB)