Motorista patay human mibangga sa nakaparadang sakyanan

NIBANGGA sa nakaparada nga sakyanan ang usa ka motorista hinungdan sa hinanali niini nga kamatayon, niadtong 4:20 Dominggo sa kaadlawon, Marso 10, sa Mother Perpetual Health Avenue, Zone 9, Barangay Patag, dakbayan sa Cagayan de Oro.

Ang biktima naila nga si Frednelle Rodriguez, residente sa Johndorf Subdivision, Barra, Opol, Misamis Oriental.

Sa nahipos nga impormasiyon, giingong nakurat na lamang ang mga residente ilabi na ang anaa sa maong dapit human nakadungog og kusog nga lagapak ug nakitang nagbuy-od na ang biktima kinsa natumbahan sa kaugalingong motorsiklo ug nagrabehan ang ulo.

Giingong gisubay sa biktima ang kadalanan sa Mother Perpetual Help Avenue paingon sa weste nga direksiyon apan aksidente kining nibangga sa nakaparada nga KIA nga Bongo.

Dali pa kining girespondehan sa Oro Rescue, apan wala na matud kini pulso kinsa gitouhang dead on the spot.

Gidala usab kini sa J.R Borja General Hospital apan gideklarang dead on arrival.

Ang maong sakyanan ang kasamtangang gikustodiya sa kapulisan karong mga panahona alang sa dugang imbestigasiyon aron masuta kung duna usab kini kalapasan.