ANIA ko karon sud sa simbahan sa Sto. Rosario, naglingkod uban sa imong kahigalaan ug kabanay. Dili unta ko moanhi kay sakit gyud bation nga ikaw kaslon na kang Kevin nga suod kong higala. Apan dia gyud ko aron pagtambong sa inyong kasal, Ellen, bisan nagdugo king akong kasingkasing nga nagmahal kanimo. Apan ayaw ingna ang akong kasingkasing sa paghunong paghigugma nimo.
Nahinumdom ka ba sa una natong panagkaila? Didto sa Mango Square, usa ka sayong gabii misud ko sa usa ka ‘pub.’ Nakita ko ikaw nga nag-inusara sa usa ka gamayng lamesa, nagdimdim og botelya sa SunMig light samtang naminaw ug nagtan-aw sa banda nga nagtukar didto sa gamayng ‘stage.’ Milingkod ko sa bakanteng lamesa duol sa imong nahimutangan, Miorder ko sa weyter og duha ka pilsen beer nga maoy akong naandan nga kalingawan og yarok pagpalabay sa oras. Milingi ka kanako nga nagpahiyom. Mibawos ko pagpahiyom. Nahurot na nimo pag-inom ang usa ka botelya sa SanMig light ug mi-order kag lain sa weyter. Paglabay sa mga gutlo namatikdan nako nga wa kay tawo nga gihulat. Human kog inom sa usa ka botelya mitindog ko ug miduol nimo.
“Waiting for someone?” matod ko nga nagpahiyom.
Mitutok ka kanako, “Nope. Am alone. Nagpalabay lang sa oras.”
“Then, may I join you? Nagpalabay lang sab ko sa oras,” matod ko.
“Sige, please sit down! It’s good to have company!”
Milingkod ko sa imong atbang. Paglabay sa mga gutlo daw daan na tang managkaila, Nahibaw-an nako nga dalaga pa ka ug nagtrabaho isip ‘auditing staff’ sa usa ka ‘Accounting & Auditing Office’ dinhi sa siyudad sa Sugbo. Mitug-an ko nimo nga ako usa ka ‘sales supervisor’ sa usa ka ‘gas company’ sa Mandaue.
Ug mao kadto ang sinugdanan hangtod nagkasuod kita sa pagpanglabay sa mga adlaw ug nakapadayag ko sa akong gibati nimo. Apan miingon ka nga managhigala lang ang atong relasyon kay may hinigugma ka na nga tua sa Saudi Arabia magtrabaho. Ug daw may hait nga tumoy sa punyal mituslok sa akong kasingkasing dihang miingon ka nga magpakasal mo inigpauli niya sa Hunyo human sa tulo ka tuig nga kontrata sa usa ka ‘oil company’ didto isip ‘mechanical engineer.’ Ug daw buto sa kanyon mibungog sa akong dalunggan dihang mitug-an ka nga si Kevin Laguardia ang imong pamanhunon, kay siya akong klasmeyt sa hayiskol ug suod kong higala.
“I’m sorry, Treb! Let’s just be friends. Okey?” miingon ka. “Padad-an ka namo ni Kevin og imbitasyon. Will you come to our wedding?”
Igo lang kong miyango. Pero didto sa akong hunahuna mihukom ko nga di motambong sa inyong kasal. Modugo lang sa kasakit ang akong kasingkasing. Nausab ra ang akong hukom dihang nagkita mi si Kevin nga kuyog nimo. Giimbitar ko ninyo sa usa ka ‘dinner’ sa usa ka ‘class’ nga restawran sa siyudad.
NAPUTOL ang akong paghanduraw dihang mitukar na ang organ ug mikanta na ang ‘choir’ sa ‘Here comes the bride, all dress in white...” Gitan-aw ko ikaw nga mipaso padulong sa altar diin naghulat si Kevin aron pagdawat kanimo gikan sa imong mama ug papa. Mihalang ang akong mga mata, may mga luhang milugmaw. Didto sa akong alimpatakan may nag-awit, ‘I went to your wedding.../ your mother was crying.../ and I was crying, too!’ “Ellen, I love you!” matod sa akong hunahuna. “Ug ayaw ingna ang akong kasingkasing sa paghunong paghigugma kanimo!”
(KATAPUSAN)