ANG akong mahinumdoman ni Chokoleit kadtong siya ang nag-front act sa concert ni Pokwang sa Grand Ballroom sa Waterfront Cebu City Hotel mga way back 2008 kay best friend man kaayo ni sila.
Lingaw kaayo to ilang concert. Nag-Miss Universe pageant si Chokoleit ug lainlaing nasud ang iyang girepresentar pero siya rang usa. Puwerteng alegreha.
Una nakong na-interbyu si Chokoleit maorag 2003 or 2004 man tingali to sa dressing room sa SM City Cebu sa backstage sa foodcourt. Sila pa tong kaubana sa aktor nga si Justin Cuyugan.
Pero ang lawas ni Chokoleit sa una di pa ingon ana katambok ug kabusyad.
Kasagaran gud sa mga taga-showbiz gamay ra og kinatulgan mao nang bawion nila sa kaon ug molaklak pa gyud tingali kay tipik man sa ilang lifestyle.
Panahon na nga dapat gyud himuong mandatory nga dunay annual o regular medical check-up ang mga artista aron makapanagang sila samtang sayo pa.
Ang kuwarta makit-an pa apan ang kinabuhi di na.
KAHIDLAW
Kadtong nag-viral nga tsula sa Pinoy Big Brother Adult sa miaging semana wa ra to katunga sa tsula nilang ex-housemates Sam Milby ug Chx Alcala sa PBB 2005.
Mao gyud to’y pinakagrabeng tsula nga na-record sa kasaysayan sa Pinoy Big Brother kadtong ilang Sam ug Chx.
Pero naa kunoy lugar diha sa PBB house nga wala butangi og CCTV. Ang mga ex-housemates ra say nisulti nako ani.
Ambot nganong wa butangi basin tingali alang sa mga housemate nga di kapugong sa ilang mga lawasnong kahidlaw. Ayay!
“MISGUIDED”
Nganong nagpa-kontrobersiyal man sad intawon ni pag-ayo si JK Labajo.
Molaban unta ta niya kay Cebuano gud. Natawo ug nidako siya dire sa Consolacion. Pero baby pa lang diay gibiyaan na siya sa iyang amahan nga usa ka German.
Ang iyang mama naminyo og usab pero namatay sad dihang 12 pa lang si JK. Luoy og lifestory ning bataa mao nang sa edad nga 18 maorag grabe ang iyang hang-ups or emotional baggage tingali.
Ako saludo kaayo ko aning iyang komposisyon nga “Buwan.”
Unta duna la’y maka-guide niya kay sayang. Kay naa na gud siya diha! Unya mawa pa tungod lang sa iyang batasan. Di ba?