DAKONG kontrobersiya karon kining pagka buking ni Gob. Imee Marcos. Wa man diay maka-gradweyt sa Princeton University ug sa University of the Philippines (UP) College of Law kining anak sa diktador nga karon gusto magpapili sa pagka senador.
Daghan karon ang moinsister sa Facebook nga si kanhi presidente Cory Aquino ug Noynoy Aquino ang niusab sa mga record sa UP.
Pero yuna pa, 1983 kintahay ni-gradweyt si Imee Marcos. Mao kini ang tuig nga gipatay si Ninoy Aquino. Nganong wala man siya maapil sa 1983 yearbook? Buot ba ipasabot nga gipang-recall ni Cory kining mga yearbook gikan sa mga ka-batch ni Imee human napalayas ang pamilyang Marcos sa 1986 dayon gipa-usab?
Ang nakaapan lang niining bakak ni Imee kay naangin mismo ang iyang kapartido, lakip na ang Malakanyang.
MGA UYAB
Pagka-ngilngig gyud diay niining Jocelyn “Joy” Encila, ang giingong drug queen nga nasikop sa miaging Marso 4 ug nakuhaan og shabu nga nagbalor og P190 milyones.
Lalim bay duna siya mga uyab nga druglord, pulis, macho dancer, ug sakop sa coast guard.
Giimbestigar na karon kining iyang mga uyab nga pulis nga giingong nahimo niyang protector. Congratulations sa local nga kapulisan nga nakasikop kang Encila ug padung na pagkabungkag ang iyang maong sindikato.
Nitingkag lang akong dunggan dihang nalambigit sab diay sa gidiling drugas ang iyang igsuon nga si Janelyn ug laing ig-agaw nga nagpuyo sa Duljo-Fatima, ang naandan na nga hotbed sa shabu. Malas lang gyud kin inga gi-ambush ug namatay.
RAMA
Bisan pa man og giisa na iyang kamot ni Presidente Rodrigo Duterte, wa gihapon mawala ang pagduda sa iyang pagkalambigit sa gidiling drugas. Gikinahanglan gyud nga ma-clear siya sa PDEA kay di baya lalim ang mga pasangil batok kaniya.
Naglibog lang gyud ko nilang Presidential Assistant for the Visayas Mike Dino nganong wala gipa-clear si Rama niadtong dugay pa ang election period.
Bati na kaayo kon karon pa nila lugiton kini ug madaot na hinuon ang kredibilidad sa maong listahan ni Presidente Duterte.
Alang kanako man gud, angay unta nga unahon ug mas prayoridad sa OPAV ang pagpatigbabaw ug pagpanalipod sa kredibilidad sa presidente kay sa niining pag-accommodate ni Rama.
Wa ko moingon nga guilty gyud si Rama. Korte lang ang makadesisyon niana. Kana kon gisang-atan siya og kaso ug dunay igong ebidensya.
Sa pagkakaron hinuon, nihatag na ba si Rama og klarong pagpaklaro sa iyang pagkasuod ni anhing Tata Negro ug anhing mayor Onik Espinosa? (@anol_cebu sa Twitter)