GIBUTYAG sa kapulisan nga posibleng magbaha ang drug money karong umaabot nga eleksiyon. Tinuod kay dako kaayo ang posiblidad nga mo-bankroll ang mga druglords ngadto sa mga pulitiko nga ilang suportahan kay aron inig daug maoy himoon nilang protektor. Dili layo kining maong posibilidad o mismo gani ang mga druglords ang magpapili aron maprotiktahan ang ilang illegal nga negosyo.
Sama gud niadtong gipatay nga si Albuera, Leyte Mayor Rolando Espinosa Sr., amahan ni self-confessed druglord Kerwin Espinosa. Kon wala pa kadto mapatay, aw, sigurado nga molipang ang negosyo sa ilang lugar kay siya guy maoy mayor. Ang mga Parojinog sa Ozamis City nga gi-ingong “untouchable” kay sila pa maoy gi-ila nga lider sa gika-intapan nga Kuratong Baleleng Gang. Ug daghan pang mga narco politicians.
Kining pagbaha sa drugas dinhi sa Sugbo posibleng signales na kini. Niadtong miaging semana, mokabat sa P200 milyones nga kantidad sa drugas ang nasakmit sa mga awtoridad sa managlahing operasyon dinhi sa Cebu City ug Consolacion. Nadakpan ang usa ka Jocelyn Encila nga maoy gi-anggan og “shabu queen” nga bagsakanan sa drugas dinhi sa Sugbo gikan sa iyang contact nga ato ma-priso sa National Bilibid Prison.
Hinuon, dili tanang pulitiko ang modawat og financial support gikan sa mga druglords. Apan siguro kadaghanan. Ang naka-porke god kay gumikan sa pinalitay og boto, ang mga pulitiko modawat na lang og contribution bisan gikan sa hugaw nga paagi ang kuwarta. Basta naa lay kuwarta nga ilang magamit.
Mao nga pabor gyud ko nga ibutyag ang mga pangalan ning mga narco-politcians aron atong mahibaw-an kon si kinsa kining maong mga pulitikoha aron usab magiyahan ang mga botante. Bahala na og mangreklamo kining maong mga panghinganlan. Aw, ilang ikiha ang taga DILG o ba kaha ang Presidente kon si kinsa man ang mobutyag niini. Asa man ang inyong palabihon, ang human rights ning maong mga tawo nga hinganlan o ang kaayuhan sa katawhan nga dili magumon sa illegal nga drugas? (bobbygnalzaro@gmail.com)