GIBALIKTAD ni Presidente Rodrigo Duterte ang iyang unang pamahayag nga andam siyang mosuporta ug mopirma sa balaudnon nga nag-umol sa pag legalize sa marijuana isip usa ka tambal.
Si Duterte una nang mipadayag sa iyang dakong pag-uyon nga ma-legal ang marijuana sa nasod kay siya sayod nga kini makatabang isip usa ka tambal.
Pero sa uwahi niyang pamulong didto sa Victorias City, Negros Occidental niadtong Biyernes sa gabii, Marso 8, ang presidente nagkanayon nga di gyud mahitabo nga mahimong legal ang marijuana ubos sa iyang administrasyon.
Iyang gisaysay kon unsay mga kadaut nga matampo unya niini sa higayon nga mahimo na kining legal sa nasod.
“Sabihin medicinal. Lahat na lang mag-medicinal na. That would be an excuse. Hindi ako pumayag,” matod pa sa presidente.
Daghan man gung nabalaka niininng House Bill 6517 o Philippine Compassionate Medical Cannabis Act nga gipangamahanan ni Isabela Rep. Rodito Albano, lakip na niini ang mga tinugyanan sa balaod.
Kini bisan pa man og dunay punto si Albano sa iyang tinguha tungod kay sigon sa research makatambal man gyud kini hinuon og sakit sa usa ka tawo.
Gipasabot ni Albano nga sa ubang nasod gitugot na ang paggamit sa medical marijuana ilabi na niadtong may sakit nga patol, cancer o HIV/AIDS.
Ingon niya nga ang maong balaodnon wala magpasabot nga gitugot na ang pagyupyop, pagpananom ug pagproseso sa marijuana kon dili dakpon gihapon ang magbuhat sa ingon.
Apan ang wa malantawi ni Albano nga ang maong balaodnon naghatag lang og agianan nga mahimong abusohan sa mga dautang elemento ug magdugang na hinuon unya og problema sa pagpakigkombati sa administrasyong Duterte batok sa mga nagkagrabing paghitak sa mga gidiling sa drugas sa nasod.