MOTIONG, Samar -- Gikondena sa Police Regional Office (PRO)-Eastern Visayas ang pag ambush sa duha ka pulis sa Motiong, Samar Police Station, alas 7:15 sa buntag, Lunes, Marso 11, 2019.
Ang duha nga gi-ambush mao sila si Police Officer 1 Jane Abejar ug Police Officer 3 Glenn Meniano.
Base sa inisyal nga imbestigasyon, ang duha ka pulis nagsakay sa ilang Mahindra patrol car nga pauli na unta sa ilang istasyon gikan nagkuha og tubig sa Paranas Police Station.
Pag abot sa Maharlika Highway duol sa Motiong New Gallera sa Barangay 1A, duha ka pagbuto ang nabati sa mga pulis nga gisundan og pagpauwan og bala.
Naigo og shrapnel sa nagkadaiyang parte sa kalawasan si Abejar apan nakadagan pa gihapon kini gikan sa pag ambush.
Dali gidala sa duol nga tambalanan si Abejar samtang wa na makaikyas si Meniano ug natusak kini sa bala.
Nakit-an ang patay'ng lawas ni Meniano kilid sa highway diin tapad niini ang ilang patrol car nga gisunog usab sa mga responsable.
Masulob-on si PRO-Eastern Visayas Director Dionardo Carlos atol sa iyang pag susi sa lugar nga nahitaboan.
Gisaad ni Carlos nga manubag ang mga nibuhat sa brutal nga pagpatay sa iyang mga sakop.
Giawhag ni Carlos ang publiko nga i-report dayun sa kapulisan ug kasundalohan ang bisan unsang kadudahang kalihukan nga mabantayan.
Mihatag ang PRO-Eastern Visayas og ayuda sa pamilya ni PO3 Meniano samtang padayun ang pag ampo alang sa dali nga pagkaayo ni PO1 Abejar.
Padayun karon ang hot pursuit operation sa kapulisan ug kasundalohan alang sa pagsikop sa mga suspek. (JKDP)