NAHIMONG tipik sa kasaysayan sa dakbayan ang kasaulogan sa Araw ng Davao sa tunga-tungang bahin sa bulan sa Marso. Karong tuiga atong gisaulog ang ika-82 nga anibersaryo sa iyang pagkahimong “chartered city” o siyudad nga dili tipik sa bisan unsang probinsiya sa Davao. Kung tawo pa kini, sobra “senior citizen” ug nagsungkod na.
Kaniadto usa ra ka probinsiya ang Davao nga gipangulohan sa gobernador.
Usa niini mao si anhing gobernador Vicente Duterte nga amahan sa atong kanhi Mayor ug kasamtangang presidente sa Pilipinas.
Kung buhi pa tingali si Governor Inteng karon moingon siya nga “yamat ra Dong Rody naapsan man ko nimo pagkasikat.”
Sa pagligdas sa daghang dekada, nahimo nang upat ang probinsiya sa Davao nga mao ang Davao del Sur diin nahimutang ang Davao City, Davao del Norte, Davao Oriental ug karong bag-o ang Davao Occidental.
Nahimo na sab nga mga “chartered” ug “component cities” ang Tagum, Mati, Digos, Panabo ug Island Garden City of Samal. Kanus-a kaha tawagong siyudad ang Malita, Sta. Cruz, Kapalong o Pantukan ba kaha?
Tiguwang ug nagsungkod na ang Davao City apan unsang mga dagkong kausaban ang atong maaninaw sa palibot?
Siyempre ang dali natong makita ang pisikal nga kausaban nga proyektong imprastraktura sama sa dalan, gambalay, taytayan, airport, piyer ug uban pa.
Anaa sab ang mga pasilidad nga tubig ug kuryente, sakyanan sa kadalanan, dagat ug kalangitan.
Nagpunsisok sab sa siyudad ang daghang estudyante gikan sa mga probinsiya.
Gani dinhi sa Davao nagtungha sa medisina ang mga kaigsuonan natong mga Bombay o Indian. Hasta ang mga trabahante ug negusyante anaa sa siyudad kay matud pa sa administrasyon ni Mayor Inday Sara, “Life is Here in Davao.”
Apan sa laing bahin, kun paminawon nato ang mga negusyante, nakulangan ug nahinayan sila sa kalamboan sa siyudad. Una kay gamay ra ang programang imprastraktura ug pasilidades sa usa ka malambuong siyudad.
Karon ra nga panahon ni Presidente Rody ubos sa iyang “Build-Build-Build” program nga nakatilaw kita og daghang proyekto gikan sa pundo sa kaulohan.
Ikaduha mao ang gamay nga oportunidad sa panarbaho tungod sa pagsalig sa ekonomiya sa agrikultura.
Hangtud karon naila ang Davao sa produktong saging, lubi ug ubang lagutmon nga limitado ra ang nakatrabaho. Hinay pa ang industrial sector nga mao untay mosalo sa daghang gradweyt ug na-train nga mga batan-on nga mosulod sa sektor sa mamumuo.
Ikatulo mao ang kalisud mosulod og negusyo dinhi. Naghinobra sab daw ang kampanya sa “peace and order” nga nagdala’g abuso sa tawhanong katungod, katawhang nahadlok ug katawhang kiko-kiko lamang sa kasamtangang namunuan.
Bisan pa man Happy Araw sa tanan!